पुकार बमसहित ६ जनालाई निर्वाचन आयोगले तोक्यो जरिवाना

काठमाडौं- निर्वाचन आयोगले काठमाडौं-१ का राष्ट्रिय स्वतन्त्र पार्टीका उम्मेदवार पुकार बमसहित ६ जनालाई जरिवाना तोकेको छ। 

आयोगबाट पत्राचार भएको आचारसंहिता उल्लंघन गरेको भन्दै जरिवानासहित उनीहरूलाई कारबाही गरेको आयोगले जनाएको छ। 

कारबाहीमा पर्नेमा काठमाडौं महानगरपालिका-१६ का वडाध्यक्ष मुकुन्द रिजालसमेत रहेका छन्। रिजालले सामाजिक सञ्जालमा उम्मेदवारलाई भोट दिई जिताउन अनुरोध गरेकाले कारबाही गरेको जनाएको छ। उनलाई ५ हजार जरिवाना तोकेको आयोगको भनाइ छ।

त्यस्तै, पुकार बमले निर्वाचन प्रचार प्रसारको क्रममा आफ्नो नाम अंकित टिसर्ट प्रयोग गरेको भन्दै ५ हजार जरिवाना तोकेको छ। बमले काठमाडौं क्षेत्र नम्बर १ बाट प्रतिनिधि सभाका लागि उम्मेदवार दिएका छन्।

यस्तै एकीकृत समाजवादीका अध्यक्ष माधव नेपालले मतदातालाई फ्री भिसा र टिकटमा युवालाई विदेश पठाइदिने भनी प्रलोभनमा पारी अभिव्यक्ति दिएको आयोगले जनाएको छ।  उक्त घटनाबारे छानबिन गर्न आयोगले जिल्ला प्रहरी कार्यालय रौतहटलाई अनुसन्धान गर्नको लागि चिठी लेखी पठाउने बताएको छ।

मुन्यमन्त्री तथा मन्त्रिपरिषद्को कार्यालय गण्डकी प्रदेश, आर्थिक मामिला तथा योजना मन्त्रालय गण्डकी प्रदेश सरकारका प्रमुख सचिव र आर्थिक मामिला तथा योजना मन्त्रालयका सचिवलाई कारबाही गरिएको छ। प्रदेश सरकारबाट करका दर हेरफेर गर्नेगरी भएको निर्णय २४ घण्टाभित्र बदर गरी सोको सानकारी गराउन आयोगले निर्देशन दिएको छ।

आयोगले बाराको पचरौता नगरपालिकाका नगर प्रमुख जलन्धर सिंह जैसवारलाई वार्षिक  बजेट तथा कार्यक्रम स्वीकर्त भएका बाहेकका अन्य कार्यक्रम गरेको भन्दै २५ हजार जरिवाना तोकेको छ।

राजनीतिक गतिविधिमा संलग्न भएको जनाउँदै आयोगले व्यापार तथा निकासी प्रवर्द्धन केन्द्रका अधिकृत गोकुल वस्तीलाई पाँच हजार जरिवाना तोकेको छ।

स्वास्थ्य सेवा विभाग टेकु र भरतपुर अस्पताललाई आचारसंहिता विपरित कर्मचारीको सरुवा तथा रमाना दिएको र त्रियुगा नगरपालिकामा ह्विल चेयर वितरण गरेको आयोगले  जनाएको छ। यस्तै  राष्ट्रिय माद्यामिक विद्यालय साँफेबगर अछामका प्रधानाध्यापक तिलक कुँवर एमालेको चुनावी प्रचारमा लागेको भन्दै पाँच हजार जरिवाना तोकिएको छ।

जनता आधारभूत विद्यालयका शिक्षक जिवछ यादव चुनावी प्रचारमा लागेको भन्दै आयोगले पाँच हजार जरिवाना तोकेको हो।