सोमाली सेनाको कारबाहीमा १२ लडाकु मारिए

मोगादिसु- अफ्रिकी मुलुक सोमालियाको सेनाले मुलुकको मध्य क्षेत्रमा गरेको कारबाहीमा १२ लडाकु मारिएका छन्। शुक्रबार मध्य सोमालियाको हिरान क्षेत्रमा सेनाले गरेको प्रत्याक्रमणमा इस्लामिक लडाकु समूह अल–शबाबका १२ जना लडाकु मारिएका हुन्।

सोमाली रक्षा मन्त्रालयका प्रवक्ता अब्दुल्लाही अली अनोदका अनुसार हिरान क्षेत्रको बुर्दार भन्ने स्थानमा रहेको सैन्य शिविरमा आतङ्ककारीहरूले आक्रमण गर्नेबारे सेनाले पूर्वसूचना प्राप्त गरेको थियो। सोही आक्रमणलाई विफल बनाउन लडाकुविरुद्ध प्रत्याक्रमण गरिएको जनाइएको छ।

बुर्दार क्षेत्रमा आक्रमणको क्रममा घाइते भएका तीन जना सैनिकहरूलाई अस्पतालमा भर्ना गरिएको प्रवक्ता अलीले सोमालियाको राष्ट्रिय समाचार संस्थालाई जानकारी दिएका छन्। हाल त्यस क्षेत्रमा आक्रमणकारीहरूको खोजी गर्नका लागि सेनाले ठूलो अभियान चलाइरहेको छ।   -सिन्ह्वा