सिराहाका दुई पालिकामा मतदाता शिक्षा कार्यक्रम सञ्चालन नगरिएपछि आयोगले सोध्यो स्पष्टीकरण

काठमाडौं– निर्वाचन आयोगले सिरहाको सखुवानान्कारकट्टी गाउँपालिका अध्यक्ष, प्रमुख प्रशासकीय अधिकृत राजीव कुमार झा र सुखीपुर नगरपालिका प्रमुख तथा प्रमुख प्रशासकीय अधिकृत चन्द्रेश्वरप्रसाद यादवलाई मतदाता शिक्षा कार्यक्रम सञ्चालन नगरेकामा स्पष्टीकरण मागेको छ।

यसअघि आयोगले आगामी ४ मंसिरमा हुने निर्वाचनलाई लक्षित गर्दै मतदाता शिक्षा कार्यक्रमलाई प्रभावकारी बनाउन केन्द्र, प्रदेश र पालिका प्रशासनलाई आग्रह गरेको थियो।

नेपालको संविधानको धारा २४७ मा यस संविधानबमोजिम निर्वाचन आयोगलाई आफ्नो काम पूरा गर्न आवश्यक पर्ने कर्मचारी र अन्य सहयोग नेपाल सरकार, प्रदेश सरकार र स्थानीय सरकारले उपलब्ध गराउनेछ भन्ने व्यवस्था छ। निर्वाचन आयोग ऐन, २०७३ को दफा ७ र ८ मा आयोगले निर्वाचनको कामका लागि स्थानीय सरकारको सहयोग लिन सक्ने र सो उपलब्ध गराउनु स्थानीय तहको कर्तव्य हुने भनी उल्लेख  छ। 

आयोग ऐन, २०७३ को दफा ४० को उपदफा (१) मा आयोगले निर्वाचन सञ्चालन गर्ने सम्बन्धमा कुनै निकाय वा पदाधिकारीलाई आवश्यक निर्देशन दिन सक्नेछ भन्ने व्यवस्था छ। उपरोक्त व्यवस्थाबमोजिम मतदाता शिक्षा कार्यक्रम सञ्चालन नभएको भए उक्त कार्यक्रम यथाशीघ्र सञ्चालन गरी पत्र प्राप्त भएको २४ घन्टाभित्र जानकारी गराउन आयोगले निर्देशन दिएको हो।