सर्लाहीमा मोटरसाइकल दुर्घटना, दुई जनाको मृत्यु

सर्लाही- सर्लाहीको ईश्वरपुर नगरपालिकाको छुट्टाछुट्टै स्थानमा मोटरसाइकल अनियन्त्रित भई पल्टिँदा दुई जनाको मृत्यु भएको छ।

ईश्वरपुर नगरपालिका-९, खोरिया टोलमा बयलवासबाट नाढीमन तालतर्फ जाँदै गरेको नम्बर खुल्न नसकेको मोटरसाइकल आफैं अनियन्त्रित भई दुर्घटना हुँदा चालक चन्द्रनगर गाउँपालिका-६ का ३५ वर्षीय विजय मुखियाको मृत्यु भएको प्रहरीले जनाएको छ। 

टाउकोमा चोट लागेर गम्भीर घाइते भएका मुखियालाई उपचारका लागि बयलवासस्थित एक अस्पताल ल्याउँदा चिकित्सकले मृत घोषणा गरेको इलाका प्रहरी कार्यालय केशरगन्जले जनाएको छ।

यस्तै, ईश्वरपुर नगरपालिका-५, सखुवनीमा ना३८प ९३२७ नम्वरको मोटरसाइकल आफैँ अनियन्त्रित भई पल्टिँदा मोटरसाइकल पछाडि सवार सोही ठाउँका २५ वर्षीय सदा अन्सारीको मृत्यु भएको प्रहरीले जनाएको छ।

अन्सारीलाई पनि थप उपचारका लागि वीरगञ्ज पुर्‍याउँदा चिकित्सकले मृत घोषणा गरेका प्रहरीले जनाएको छ। मोटरसाइकलका चालक भने प्रहरी नियन्त्रणमा छन्।