गणेशमानको १०८औं जन्मजयन्ती मनाइँदै

काठमाडौं- नेपाली कांग्रेसका संस्थापक नेता गणेशमान सिंहको १०८औं जन्मजयन्ती मनाइने भएको छ। नेपाली कांग्रेस र उसका भ्रातृ संगठनले आज विभिन्न कार्यक्रम गरेर गणेशमान जयन्ती मनाउने भएका हुन्।

काठमाडौं क्षेत्र नम्बर १ को नेपाली कांग्रेस क्षेत्रीय कार्यसमितिको आयोजनामा आज बिहान काठमाडौं-१० स्थित सुवर्ण पार्क जोगीकुटीमा माल्यार्पण कार्यक्रम गरिएको छ।

कार्यक्रममा गणेशमान पुत्र एवं नेपाली कांग्रेसबाट काठमाडौं क्षेत्र नम्बर १ का प्रतिनिधि सभा सदस्य उम्मेदवार प्रकाशमान सिंहलगायतका नेताहरूको सहभागिता रहेको थियो।

गणेशमान सिंहले नेपाली प्रजातान्त्रिक आन्दोलनका नायक बीपी कोइरालासँग मिलेर नेपाली कांग्रेस स्थापनासमेत गरेका थिए। उनी नेपाली राजनीतिमा संघर्ष र इमान्दारिताका पर्‍याय मानिन्छन्। राणा शासनको अन्त्य र प्रजातन्त्र बहालीका लागि सिंहको योगदानलाई अतुलनीय मानिन्छ।