गण्डकीका ऊर्जामन्त्री आचार्य बर्खास्त, प्रचण्डको चुनावी माहोल बिगारेको आरोप

काठमाडौं– गण्डकी प्रदेशका ऊर्जामन्त्री हरिशरण आचार्य बर्खास्तीमा परेका छन्। मुख्यमन्त्री कृष्णचन्द्र नेपाली पोखरेलले मन्त्री आचार्यलाई हटाउन प्रदेश प्रमुखसमक्ष पत्र पठाएका हुन्।

गोरखा–२ का आचार्यले नेकपा माओवादी केन्द्रका अध्यक्ष पुष्पकमल दाहाल प्रचण्डविरुद्ध मत मागेको आरोप लागेपछि मुख्यमन्त्रीले हटाउन लागेका हुन्। आचार्य २०७४ सालमा बाबुराम भट्टराई नेतृत्वको नयाँ शक्ति पार्टी नेपालबाट गण्डकी प्रदेशसभामा निर्वाचित भएका थिए।

गोरखामा आचार्यले आफूविरुद्ध मत मागेको भन्दै प्रचण्डले बाबुराम भट्टराईसमक्ष पनि गुनासो गरेका थिए। यो कुरा प्रधानमन्त्री शेरबहादुर देउवासमक्ष पनि पुगेपछि उनले गण्डकीका मुख्यमन्त्री पोखरेललाई भनेर हटाउन लगाएको बताइएको छ।

बाबुराम भट्टराई नेतृत्वको नेपाल समाजवादी पार्टीमा रहेका आचार्य ४ मंसिरको प्रदेशसभा निर्वाचनमा गोरखा क्षेत्र नम्बर २ (कं) बाट उम्मेदवारको आकांक्षी थिए। तर, नेपाल समाजवादी पार्टीबाट फणिन्द्र देवकोटा प्रदेशसभा सदस्य उम्मेदवार भएपछि आचार्यले स्वतन्त्र उम्मेदवारी दिएका थिए। पछि उनले उम्मेदवारी फिर्ता लिएका थिए।