लाखौं रकम हिनामिना गरेको आरोपमा विराट शिक्षण अस्पतालका १० जना कर्मचारी पक्राउ

काठमाडौं– मोरङको बूढीगंगा गाउँपालिका–२ स्थित विराट मेडिकल कलेज शिक्षण अस्पतालको लाखौं रुपैयाँ हिनामिना गरेको आरोपमा कर्मचारीहरु पक्राउ परेका छन्। रकम हिनामिना गरेको आरोपमा अस्पतालको बिलिङ, डिस्चार्ज र रिसेप्सन शाखामा कार्यरत १० जना कर्मचारी पक्राउ परेका हुन्।

अस्पतालले दिएको जाहेरीका आधारमा प्रहरीले सुरुमा बिलिङ एन्ड डिस्चार्ज शाखाका प्रमुख २६ वर्षीय दुर्गाबहादुर विष्ट र क्यासियर २४ वर्षीय अश्विन भट्टराईलाई पक्राउ गरेको थियो। अनुसन्धान गर्दै जाँदा अनियमिततामा अरु कर्मचारीको पनि संलग्नता रहेको पाइएपछि बाँकी आठ जना समातिएका हुन्। 

पक्राउ पर्ने अन्य कर्मचारीमा २८ वर्षीय सुनील पासवान र दीपेन्द्र तब्दार, २७ वर्षीय प्रभुनारायण चौधरी, २६ वर्षीय सुशील पासवान, २३ वर्षीया स्वस्तिका श्रेष्ठ, २१ वर्षीय करन विश्वकर्मा, २३ वर्षीय नरनारायण चौधरी र २३ वर्षीय वसन्तकुमार राम रहेका छन्। 

पक्राउ परेकाहरु विरुद्ध ठगी मुद्दा चलाउन अदालतबाट म्याद थप गरेर अनुसन्धानको बाँकी प्रक्रिया अघि बढाइएको प्रहरीले बताएको छ। प्रारम्भिक अनुसन्धानबाट ५७ लाख ९५ हजार १ सय ६० रुपैयाँ हिनामिना भएको खुलेको छ। 

पक्राउ परेकाहरुले अर्काको युजर आइडी र पासवर्ड प्रयोग गरेर बिरामीका आफन्तले अस्पतालका नाममा जम्मा गरेको धरौटीबापतको रकम अनधिकृत रूपमा फिर्ता दिएर, नक्कली बिरामी खडा गरेर र अस्पतालको आधिकारिक व्यक्तिबाट स्वीकृति नलिई बिरामीको खाताबाट अस्वाभाविक रूपमा छुट देखाएर आर्थिक अपचलन गरेको पाइएको प्रहरीले बताएको छ।