पाकिस्तान टी-ट्वान्टी विश्वकपको सेमिफाइनलमा

काठमाडौं- अस्ट्रेलियामा जारी टी–ट्वान्टी विश्वकपअन्तर्गत सुपर १२ को अन्तिम खेलमा पाकिस्तानले बंगलादेशलाई ५ विकेटले पराजित गर्दै सेमिफाइनलमा स्थान सुरक्षित गरेको छ। बंगलादेशले दिएको १२७ रनको लक्ष्य पछ्याएको पाकिस्तानले  १८.१ ओभर खेल्दै  लक्ष्य पूरा गरेको हो। पाकिस्तानको जितमा मोहमद रिजवानले सर्वाधिक ३२ रन जोड्दा मोहमद हरिसले ३१ रन बनाए। 

त्यस्तै, कप्तान बाबर आजमले २५ रन बनाए। बलिङतर्फ बगंलादेशका लागि शकिब अल हसन, मुस्ताफिजुर रहमान, एबाडोट होसेन र नसुम अहमेदले समान १÷१ विकेट लिए।

सुरुआतमा टस जितेर पहिला ब्याटिङ गरेको बंगलादेशले निर्धारित ओभर खेल्दै ८ विकेटको क्षतिमा १२६ रन बनायो। बंगलादेशका लागि ओपनर नाज्मुल हसनले ४८ बलमा सर्वाधिक ५४ रन बनाए।

त्यस्तै, अर्का ओपनर लिटन दास ८ बलमा १० रनमै आउट भए। सौम्य सरकार १७ बलमा २० रन बनाएर आउट भए। बलिङतर्फ पाकिस्तानका लागि शाहिन शाह अफ्रिदीले ४ विकेट लिए। त्यस्तै, शादब खानले २ विकेट लिए। यो जितसँगै पाकिस्तानले समूह–२ बाट सेमिफाइनलमा स्थान पक्का गरेको हो।

५ खेल खेलेर ४ अंक मात्रै जोडेको बंगलादेश प्रतियोगिताबाट बाहिरिएको छ। पाकिस्तानले ५ खेलमा ६ अंक जोडेको छ।