टी–२० विश्वकपको सेमिफाइनलमा पुग्यो न्युजिल्यान्ड

काठमाडौं– केन विलियम्सनको उत्कृष्ट पारीमा आयरल्यान्डलाई हराउँदै न्युजिल्यान्ड अष्ट्रेलियामा जारी आईसीसी टी–२० विश्वकपको सेमिफाइनलमा पुगेको छ। समूह १ मा रहेको न्युजिल्यान्ड पाँच खेलमा सात अंक जोड्दै विश्वकपको सेमिफाइनलमा पुगेको हो।

सुपर १२ को अन्तिम खेलमा आयरल्यान्डलाई ३५ रनले हराउने क्रममा विलियम्सनले ३५ बलमा ६१ रनको योगदान दिएका थिए। उनको सो रनको सहयोगमा न्युजिल्यान्डले पूरा ओभर खेल्दै छ विकेट गुमाएर १८५ रन बनाएको थियो।

जवाफमा आयरल्यान्डले २० ओभरमा नौ विकेट गुमाएर १५० रन मात्र बनाउन सक्यो। विश्वकपमा अहिले अफगानिस्तान र अष्ट्रेलियाको खेल भइरहेको छ। अफगानिस्तान सुपर १२ बाटै बाहिरिसकेको छ भने अष्ट्रेलिया सेमिफाइनलको दावेदार टिम हो। समान चार खेलबाट अष्ट्रेलिया र इंग्ल्यान्डले ५–५ अंक बनाएका छन्।

अर्को खेलमा इंग्ल्यान्डले श्रीलंकाको सामना गर्नेछ।