युरोपा लिगमा युनाइटेड, आर्सनल र रोमाको जित

काठमाडौं- युइएफए युराप लिगअन्तर्गत बिहीबार रातिको खेलमा म्यानचेस्टर युनाइटेड, आर्सनल र रोमाले जित निकालेका छन्।

स्पेनिस क्लब रियल सोसिडाडको मैदानमा गएराति सम्पन्न खेलमा युनाइटेडले घरेलु टिमलाई १–० ले हराएको हो। खेलको १७औं मिनेटमै अलेजेन्द्रो गर्नाचोले अग्रता बनाएका थिए। सोहि अग्रता जोगाउँदै युनाइटेडले जित निकालेको हो।

समूह 'इ' मा रहेको युनाइटेड यो जितका बाबजुद उपविजेता भएर अर्को चरणमा प्रवेश गरेको छ। समान १५ अंक भएको सोसिडाड भने शीर्षस्थानमा छ।

समूह 'ए' को खेलमा भने आर्सनलले घरेलु मैदानमा एफसी जुरिचलाई १–० ले नै हराएको हो। किइरन टियर्नीले १७औं मिनेटमा बनाएको अग्रता जोगाउँदै आर्सनले जित निकालेको हो।

यो जितसँगै १५ अंक बनाएको आर्सनले तालिकाको शीर्षस्थानमा रहँदै अर्को चरणमा प्रवेश गरेको हो। यता गएराति जिलिम्टलाई हराएको पिएसभी दोस्रो स्थानमा रहेर अर्को चरणमा प्रवेश गरेको छ।

समूह 'सी' अन्तर्गतको खेलमा भने रोमाले लुडोगोरेट्सलाई ३–१ ले हराएको छ। पहिलो हाफमै एक गोलले पछि परेको अवस्थाबाट रोमालाई पेनाल्टीमा गोल दिलाउँदै लोरेन्जो पेलेग्रेनीले ५६औं मिनेटमा बराबरीसम्म पुर्याएका थिए।

६५औं मिनेटमा रोमाले दोस्रो पेनाल्टी पाएपछि उनले दोस्रो गोल गरेर अग्रता आफ्नो हातमा लिए। खेलको ८५औं मिनेटमा रोमाका लागि तेस्रो गोल भने निकाले जानियओलोले गरेका थिए।

यो जितका बाबजुद १० अंक बनाएको रोमा समूहमा उपविजेता हुँदै अर्को चरणमा प्रवेश गरेको छ। तालिकाको शीर्षस्थानमा भने रियल बेटिस छ।