सागर ढकाल भन्छन् – कांग्रेस बलियो बनाउन मैले चुनाव जित्नुपर्छ

काठमाडौं– प्रधानमन्त्री तथा नेपाली कांग्रेसका सभापति शेरबहादुर देउवालाई ‘काउन्टर’ दिन डडेल्धुराबाट प्रतिनिधिसभा सदस्यमा स्वतन्त्र उम्मेदवारी दिएका सागर ढकालले कांग्रेसलाई बलियो बनाउन आफूले जित्नुपर्ने बताएका छन्।

प्रधानमन्त्री देउवाको स्वागत गर्न बिहीबार मालासहित लाइनमा बसेका उनले सञ्चारकर्मीसँग बोल्दै नेपालको विकास गर्न कांग्रेसको सक्रिय कार्यकर्ता २० लाखबाट घटेर १ लाख हुनुपर्ने बताए।

कांग्रेसका धेरै कार्यकर्ताले राजनीमा दिएमात्रै देशको विकास हुने टिप्पणी उनको थियो। ‘नेपालको विकास गर्ने हो भने कांग्रेसको सक्रिय कार्यकर्ताको संख्या २० लाखबाट घटेर १ लाख जति मात्रै भए पनि हुन्छ। त्यसैले यदि कांग्रेसलाई बलियो बनाउने हो भने मैले जित्नुपर्छ। अनिमात्र देशको विकास हुन्छ,’ उनले कांग्रेसका सक्रिय कार्यकर्ता घट्नुपर्ने दोहोर्‍याउँदै भने, ‘धेरै कांग्रेसका कार्यकर्ताले कांग्रेसबाट राजीनामा दिनुपर्छ। अनि बल्ल देशको विकास हुन्छ।’

देशको विकास गर्न दलगत सक्रियता नचाहिने उनको भनाइ थियो। पाँच वर्षअघि बीबीसीमा प्रसारण भएको साझा सवाल कार्यक्रममा प्रधानमन्त्री देउवालाई नेपालमा अक्सफोर्ड विश्वविद्यालय पढेको प्रधानमन्त्री हामी कहिले पाउँछौँ भनेर सवाल गरेर चर्चामा आएका ढकाल पछिल्लो समय देउवाकै प्रतिस्पर्धीका रुपमा डडेलधुरामा मत मागिरहेका छन्। गुल्मीका ढकालले पाँच वर्षअघि प्रधानमन्त्री देउवालाई प्रश्न गर्दा देउवाले झोक्किँदै ‘तपाईं बढ्ता बोल्दै हुनुहुन्छ’ भनेर हप्काएका थिए।