चट्याङ लागेर श्रीमानको मृत्यु श्रीमति घाइते

सुर्खेत-चट्याङले लागेर सुर्खेतमा एक जनाको मृत्यु भएको छ । अर्का एकजना घाइते भएका छन् । 

जिल्ला प्रहरी कार्यालय सुर्खेतले दिएको जानकारी अनुसार गुर्भाकोट-१४ जुगेपानीका ५० वर्षीय प्रेमबहादुर कामीको मृत्यु भएको छ । चट्याङले लागेर उनकी श्रीमति खगिसरा पुन घाइते भएकी छिन् । घाइते पुनको मेहेलकुना अस्पतालमा उपचार भैरहेको छ ।

‘दशबजेतिर घरमा चट्याङ परेको रहेछ,’ जिल्ला प्रहरी कार्यालय सुर्खेतका डिएसपी श्यामसिंह चौधरीले भने ‘चट्याङ्ले घरमा बसिरहेको श्रीमानको मृत्यु भएको छ भने उनकी श्रीमति घाइते छिन् ।’ 

प्रहरीका अनुसार गोठमा रहेका दुईवटा गाई, एउटा गोरु र एउटा कुकुरको समेत मृत्यु भएको छ ।