प्रधानन्यायाधीशमा अस्वीकृत जोशी सर्वोच्च फर्किए, तर पेशी पाएनन्

काठमाडौं- संसदीय सुनुवाई विशेष समितिबाट प्रधानन्यायाधीशका लागि अस्विकृत भएका दीपकराज जोशी सर्वोच्च अदालत फर्किएका छन् । ओमप्रकाश मिश्र प्रधानन्यायाधीश बनेपछि उनलाई स्वागत गर्दै जोशी सर्वोच्च फर्किएका हुन्  । 

तर, नियमित कामकाज गर्ने गरि फर्किएका जोशीले पेशी भने पाएनन् । मंगलबार ३१८ वटा पेशी तोकिएकोमा जोशीको भागमा एउटा इजलास पनि नपरेको हो । प्रधानन्यायाधीश मिश्रले पेशी नतोके पछि जोशी अलमलमा परेका छन् । स्रोतका अनुसार उनलाई तत्कालै पेशी नदिने मनस्थितीमा मिश्र छन् । 

शैक्षिक प्रमाणपत्र विवादका कारण प्रधानन्यायाधीश हुनबाट रोकिएपछि जोशी घरबिदामा बसेका थिए । जोशीले आफूले प्रधानन्यायाधीश नभएर कार्यवाहक प्रधानन्यायाधीशको जिम्मेवारीमात्र सम्हालेको बताएका थिए । जोशीले मिश्र र आफू सहकर्मी भएकाले कार्यसम्पादमा कुनै समस्या नपर्ने बताएका थिए । तर, मिश्रले इजलास नदिए पछि उनी अलमलमा परेको स्रोतले जनाएको छ ।  

जोशी संवैधानिक परिषद्को सिफारिसपछि सुनुवाइ समितिमा पुगेर अस्विकृत भएका थिए । नेपालको न्यायालयकै इतिहासमा प्रधानन्यायाधीशका रूपमा अस्वीकृत हुने पहिलो व्यक्ति बनेका थिए । समितिले उनलाई पाँचवटा अभियोग लगाउँदै मतदान प्रक्रियामा लगेर दुई तिहाइबाट अस्वीकृत गरेको थियो । 

शैक्षिक प्रमाणपत्रको विवादमा तानिएका जोशी न्यायिक सम्पादन र आचरणको सवालमा पनि विवादित बन्दै आएका थिए । उनीविरुद्ध संसदीय सुनुवाइ समितिमा पाँचवटा उजुरीसमेत दर्ता भएका थिए । उनीविरुद्ध इजलासमै निदाउनेदेखि छोराको बिहेमा अकूत सम्पत्ति खर्च गरेकोसम्मका आरोप लागेका थिए ।

पाँच जनाले हालेको उजुरीमा क्यासिनोदेखि एनसेल र अन्य कर छुट दिने विवादास्पद फैसलामा जोशी संलग्न रहेको आरोप लागेको थियो । शैक्षिक प्रमाणपत्रको विवादसँगै न्यायाधीशका रूपमा जोशीले गरेका केही विवादास्पद फैसला, आदेश र गतिविधि नै उनलाई प्रधानन्यायाधीश बन्नबाट रोक्ने कारणहरू देखाइएको थियो ।