भलिबलमा यू-२३ को खुला छनोट हुने, बीच भलिबलको खेलाडी पनि छानिँदै

काठमाडौं- नेपाल भलिबल संघ(एनभिए) ले राष्ट्रिय यू २३ पुरुष भलिबल टिम बनाउनका लागि खुला छनोट गर्ने भएका छ। एनभिएको मंगलबार सम्पन्न बोर्ड बैठकले यू २३ को खुला छनोट गर्ने निर्णय गरेको संघले जानकारी दिएको हो।

यसअघि लामो समयसम्म संघले यू-२३ को टिम बनाएको थिएन। उसले आउँदो डिसेम्बरमा ढाकामा हुने यू २३ काभा प्रतियोगितामा समावेश गराउनका लागि यू २३ को छनोट गर्न लागेको हो।

यो प्रतियोगिता डिसेम्बर २० देखि २७ तारिखसम्म बंगलादेशको ढाकामा हुँदैछ। त्यसका लागि संघले आगामी कार्तिक २१ देखि २३ सम्म राष्ट्रिय खेलकुद परिषद्को कभर्डहलमा हुन लागेको हो।

त्यस्तै भलिबल संघले सिनियर महिला तथा पुरुषलाई पनि सोही समयमा कभर्डहलमा बोलाएको छ। कावा बीच भलिबलमा सहभागिताको लागि संघले सिनियर खेलाडीलाई पनि उपस्थित हुन आग्रह गरेको हो।

‘सहभागी टिमबाट एक पुरुष तथा एक महिलाबीच भलिबल टिम निर्माण गरिनेछ,’ संघले सूचनामा लेखेको छ, ‘सबै जिल्लाका इच्छुक खेलाडीहरूले नागरिकतासहित कार्तिक २१, २२ र २३ मा उपस्थित हुनका लागि सूचित गरिन्छ।’

संघले आफ्ना सबै प्रदेशका सङ्घहरूलाई पनि खेलाडी छनोटमा सहयोग गर्नका लागि अनुरोध गरेको छ।