तिनाउमा बाढी नियन्त्रण बाहिर, सतर्क रहन बुटवलबासीलार्इ अपिल 

रुपन्देही- सोमबार दिउँसो पाल्पामा परेको अविरल वर्षाका कारण बुटवलस्थित तिनाउ नदीमा बाढी नियन्त्रण बाहिर गएको छ। नदीमा यस वर्षकै पानीको बहाव उच्च मापन गरिएको छ। नदीको बहाव खतरा उन्मुख भएकोले बुटवल उमहानगरबासीलार्इ सर्तक रहन अपिल गरिएको छ। 

बुटवलमा भने पानी परेको छैन। एक्कासी नदीको बहाव बढेपछि नदी आसपासका हजारौं घरधुरी जोखिममा रहेको जिल्ला प्रशासन कार्यालयले जनाएको छ। 

नदीको बहाव बढेपनि अहिलेसम्म कुनै क्षति भने नभएको प्रशासनले जनाएको छ। पाल्पामा भने निरन्तर पानी परिरहेकोले रातिमा बहाव जनै बढ्ने आशंका गरिएको छ। बहाव बढ्नसक्‍ने भएकोले सतर्क रहन र सुरक्षित ठाउँमा बस्न बुटवल उपमहानगरपालिकाका मेयर शिव सुवेदीले अपिल गरेका छन्।

बुटवलको पाल्पा सडक खण्डको तीन ठाउँमा गएको पहिरो हटाएपछि यातायात सुचारु भएको छ।