इपिएल : आर्सनल शीर्षस्थानमा फर्कियो, रासफर्डको सय गोल पुरा

काठमाडौं- गएको बिहीबार युरोपा लिगमा बेहोरेको हारबाट जिततर्फ लम्किएको आर्सनल फेरि प्रिमियर लिगको शीर्षस्थानमा फर्किएको छ। बिहीबार राति पिएसभी इन्दोवेनासँग हार बेहोरेको चौथो दिनमा सानदार जितसहित आर्सनल घरेलु लिगको शीर्षस्थानमा फकिएको हो।

घरेलु मैदानमा भएको खेलमा आर्सनलले पाहुना टिम नटम फरेस्टलाई ५–० ले हराएको हो। अघिल्लो खेलमा लिभरपुललाई हराएको टिमविरुद्ध ग्याब्रियल मार्टिनेलीले अग्रता दिलाएका थिए। उनको रिप्लेसमेन्टमा आएका रिस नेल्समले अग्रता दोब्बर बनाए। जुन नेल्सनको आर्सनलमा सन् २०२०को नोभेम्बरपछि पहिलो गोल बनेको छ।

खेलमा थोमस पार्टी र मार्टिन ओडेगार्डले पनि गोल थपेका थिए। यससँगै पाँच गोलको अग्रता बनाएर जित निकालेको आर्सनलले १२ खेलबाट ३१ अंक बनाएको छ। दोस्रो स्थानमा रहेको म्यानचेस्टर सिटीको २९ अंक छ।

आइतबार रातिको खेलमा गोल गरेका मार्कस रासफर्डले भने म्यानचेस्टर युनाइटेडबाट सय गोल पुरा गरेका छन्। गएराति वेस्टह्यामलाई हराउने क्रममा एकमात्र गोल गरेका राशफर्डले आफ्नो क्लबबाट सय गोल पुरा गरेका हुन्।

क्रिस्टियन एरिक्सनको पासमा उनले ३८औं मिनेटमा बनाएको अग्रता बचाउँदै युनाइटेडले जित निकालेको हो। यो जितसँगै युनाइटेडले ८५औं वार्षिकोत्सव मनाएको छ। सन् १९३७ यता चार हजार एक १६३ खेल खेलेको युनाइटेडले जहिले पनि आफ्नो एलिट एकेडेमीको खेलाडी उच्चस्तरको बनाउने गरेको बीबीसीले जनाएको छ। गएरातिको खेलसँगै राशफर्ड युनाइटेडका लागि सय गोल गर्ने २२औं खेलाडी बनेका छन्।