संविधानको रक्षाका लागि गठबन्धन निर्माण भएको हो : पूर्वमन्त्री आचार्य

काठमाडौं- नेपाली कांग्रेसका नेता एवं पूर्वमन्त्री नरहरि आचार्यले संविधानको रक्षाका लागि गठबन्धन निर्माण भएको बताएका छन्। नेपाल लोकतान्त्रिक खेलकुद सङ्घले आज टोखामा आयोजना गरेको ‘खेलाडी सम्मान तथा शुभकामना आदानप्रदान कार्यक्रम’ मा उनले कांग्रेस नेतृत्वमा निर्माण भएको संविधानको रक्षा गर्नका लागि वर्तमान गठबन्धन निर्माण भएको बताए। 

'मुलुकलाई अप्ठ्यारो पर्दा हरेक समय कांग्रेसले निकास दिँदै आएको छ, समृद्ध मुलुक निर्माणमा पनि कांग्रेसले नेतृत्व गर्छ,' उनले भने। नेता आचार्यले खेलाडीले आफ्नो ऊर्जावान् समयमा देशलाई खेलकुद क्षेत्रबाट गरेको योगदानको उच्च सम्मान गर्नुभयो। खेलकुदमार्फत राष्ट्रलाई चिनाउन खेलाडीको महत्वपूर्ण योगदान रहेको उनको भनाइ थियो। 

कांग्रेस नेता एवं काठमाडौं क्षेत्र नं ५ का प्रतिनिधिसभा सदस्यका उम्मेदवार प्रदीप पौडेलले हरेक युवालाई खेलकुद क्षेत्रमा जोड्न जरुरी रहेको बताए। 'खेलकुदले समाज र देशलाई चिनाउँछ, व्यक्तिलाई अनुशासित बनाउने काम गर्छ, खेलकुदको सकारात्मक पक्षलाई हाम्रो समाजमा स्थापित गर्र्नु जरुरी छ,' उनले भने। 

नेता पौडेलले युवामैत्री सहर निर्माण गर्न खेलकुदमैत्री वातावरण निर्माण गर्नुपर्ने बताए। युवाको व्यक्तित्व विकासका लागि खेलकुद क्षेत्रमा सरकारले लगानी गर्नुपर्ने उनको भनाइ छ। उनले टोखामा उत्पादन हुने चाकूलाई अन्तर्राष्ट्रिय बजारसम्म लैजाने आफ्नो योजना रहेको सुनाए। 

काठमाडौँ क्षेत्र नं ५ लाई सांस्कृतिक सहरका रुपमा विकास गरिने उहाँको भनाइ थियो। नेता पौडेलले सांसद विकास कोषलाई पारदर्शी ढङ्गले सञ्चालन गर्ने बताए। संघका सचिव मनिष जोशीले मुलुकको खेलकुद क्षेत्रको विकासका लागि नेपाल लोकतान्त्रिक खेलकुद संघले खेलाडीलाई ऊर्जा थप्नका लागि विभिन्न कार्यहरु गर्दै आएको जानकारी दिए। 

कार्यक्रममा फुटबलका खेलाडी रामचन्द्र श्रेष्ठ, मनिन्द्रराज जोशी, वक्सिङका खेलाडी अर्जुनबहादुर केसी, पुष्पराज जोशी, क्रिकेटका खेलाडी पारस खड्का, पर्वतारोही पूर्णीमा श्रेष्ठलगायत तीन दर्जनभन्दा बढी खेलाडीलाई सम्मान गरिएको थियो।