सोमबार घोषणापत्र ल्याउँदैछ राप्रपा

काठमाडौं- राष्ट्रिय प्रजातन्त्र पार्टी (राप्रपा)ले सोमबार चुनावी घोषणापत्र सार्वजनिक गर्ने भएको छ। सोमबार थापागाउँस्थित बानेश्वर बैंक्वेटमा एक कार्यक्रम गरी घोषणापत्र सार्वजनिक गर्न लागिएको प्रवक्ता मोहन श्रेष्ठले जानकारी दिएका छन्। 

अध्यक्ष राजेन्द्र लिङ्देनले घोषणापत्र सार्वजनिक गर्नेछन्। मंसिर ४ मा हुने प्रतिनिधि सभा र प्रदेश सभा निर्वाचनका लागि घोषणापत्र ल्याउन लागेको हो। 

राप्रपाले देशका अधिकांश स्थानमा उम्मेदवार खडा गरेको छ। यद्यपि आफू बलियो भएका प्रतिनिधि सभाका तीन वटा क्षेत्रमा भने एमालेसँग तालमेल गरेको छ। तीन स्थानमा एमालेको समर्थन आफूलाई जुटाउँदा उसले ११ स्थानमा भने एमालेका उम्मेदवारलाई सघाउने निर्णय गरेको छ। 

राप्रपा र एमालेका अध्यक्ष उम्मेदवार बनेको क्षेत्रमा आपसी तालमेल छ। झापा-३ मा राप्रपाबाट उम्मेदवार बनेका लिङ्देनलाई एमालेले सघाउँदा झापा-५ मा एमाले अध्यक्ष केपी शर्मा ओलीलाई समर्थन गर्ने उनीहरूको सहमति छ। 

हलो चुनाव चिह्न लिएको राप्रपाले हिन्दू राष्ट्र र राजतन्त्रको मुद्दा उठाउँदै आएको छ।