बिमस्टेक सैन्य अभ्यास सुरु, नेपाल र थाइल्याण्ड गएनन्

काठमाडाैं-  भारत पुणेमा बिमस्टेक राष्ट्रहरुबीचको सैन्य अभ्यास सुरु भएको छ । 

सोमबार र मंगलबार हुने सैन्य अभ्यासमा भारत, बंगलादेश, श्रीलंका, म्यानमार र भुटान सहभागी छन् भने नेपाल र थाइल्याण्डले भाग लिएनन् । यद्यपी नेपाल पर्यवेक्षक राष्ट्रको रुपमा भने सहभागि भएको छ ।

गत भदौँ १४ र १५ गते काठमाडौंमा भएको बिमस्टेक शिखर सम्मेलनमा सैन्य अभ्यासको प्रस्ताव भारतले गरेको थियो । सोहि प्रस्ताव बमोजिम सोमबारबाट भारतमा सैन्य अभ्यास सुरु गरिएको हो । भारतले आफ्नो शक्ति देखाउन सैन्य अभ्यासको प्रस्ताव गरेको भन्दै नेपालले त्यसमा भाग लिन नहुने आवाज जोडदार रुपमा उठेको थियो । 

सैन्य अभ्यासको चर्को विरोध भएपछि नेपाल सरकारले अन्तिम समयमा आएर सैन्य अभ्यासमा भाग नलिने निर्णय गरेको हो । यसअघि सो सैन्य अभ्यासमा नेपाली सेनाका ३० जनाको टोली सहभागी हुने तय भए पनि शनिबार सरकारले सैन्य अभ्यासमा नजाने निर्णय गरेको हो । 

सैन्य अभ्यासमा थाइल्याण्डले पनि सहभागिता नजनाए पछि भारतलाई ठूलो झट्का लागेको छ । भारतीय प्रस्तावमा सुरु भएको सैन्य अभ्यासमाथि नै प्रश्न चिन्ह समेत खडा भएको छ ।