काठमाडौं – अजष्ट्रेलियामा जारी आईसीसी टी–२० ट्वान्टी विश्वकप क्रिकेटमा भारतले लगातार दोस्रो जित निकालेको छ। यसअघि पाकिस्तानलाई हराएको इन्डियाले दोस्रो खेलमा पनि जित निकालेको हो।
सिड्नीमा बिहीबार भएको खेलमा नेदरल्यान्ड्सलाई ५६ रनले हराउँदै भारतले लगातार दोस्रो जित निकाल्यो।
टस जितेर पहिले भारतले ब्याटिङ गरेको थियो। जहाँ भारतले २० ओभरमा २ विकेट गुमाएर १ सय ७९ रन बनाएको थियो। भारतका लागि विराट कोहलीले अविजित रहदै ६२ रनको अर्धशतकीय इनीङ खेलेका थिए। कप्तान रोहित शर्माले ५३ रनको अर्धशतकीय इनीङ खेल्दा सूर्यकुमार यादबले पनि अविजित रहदै ५१ रनको अर्धशतकीय इनीङ खेले।
यता, भारतले दिएको १ सय ८० रनको लक्ष्य पछ्याएको नेदरल्यान्ड्सले २० ओभरमा ९ विकेट गुमाएर १ सय २३ रन मात्र बनाउन सक्यो ।
नेदरल्यान्ड्सका लागि टिम प्रिन्गलले सर्वाधिक २० रन जोड्दा कोलिन एकरम्यानले १७ रन बनाए भने म्याक्स ओवेड, बास डी लि र शरिज अहमदले समान १६ रन जोडे।
भारतका भुवनेश्वर कुमार, अर्शदिप सिंह, अक्षर पटेल र रविचन्द्र आश्विनले २–२ विकेट लिए।