प्रस्तावित प्रधानन्यायाधीश मिश्रको सुनुवाइ आज 

काठमाडौं- संसदीय सुनुवाइ विशेष समितिले प्रस्तावित प्रधानन्यायाधीश ओमप्रकाश मिश्रको सोमबार सुनुवाइ गर्दैछ । 

समितिले आज बिहान ९ बजेपछि उनको सुनवाई गर्न लागेको हो । विभिन्न चारवटा विषयमा उनीविरुद्ध उजुरी परेको थियो । जसमध्ये एक जनाले आफ्नो उजुरी फिर्ता लिएका छन् भने बाँकी तीन उजुरीमाथि आइतबार छलफल थियो । 

आइतबारको बैठकमा उजुरीकर्ताहरुलाई बोलाएर समितिले छलफल गरेको हो । उजुरीकर्ताको कुरा सुनेपछि आज सांसद्हरुले उक्त विषयमा प्रश्न गर्ने छन् भने प्रस्तावित प्रधानन्यायाधीश मिश्रले जवाफ दिनेछन् । 

उनीविरुद्ध परेको उजुरीमा सशस्त्र प्रहरीका तत्कालीन डीआईजी रञ्जन कोइरालाको मुद्दामा नातेदारको पक्षमा फैसला गरिएको आरोप छ । त्यसैगरी अर्को फौजदारी मुद्दामा चारजनालाई सफाइ दिएको आरोप छ । प्रश्नपत्र बिक्रीको आरोप लागेका व्यक्तिकै पक्षमा फैसला गरेको अर्को आरोप रहेको छ । संसदीय सुनुवाइ समितिमा मिश्रले यि विषयमा स्पष्ट पार्नुपर्ने हुन्छ ।

समितिले सुनुवाइपछि अनुमोदन सम्बन्धी निर्णय गर्नेछ । समितिमा दुईतिहाइले प्रस्तावित व्यक्तिलाई अस्वीकृत पनि गर्न सक्छ । यसअघि प्रधानन्यायाधीशमा सिफारिस गरिएका दीपकराज जोशीलाई संसदीय सुनुवाइ समितिले अस्वीकृत गरेको थियो ।

समितिले उनको नाम अनुमोदन गरेमा राष्ट्रपतिले स्विकृत गरेपछि उनले औपचारिक रुपमा प्रधानन्यायाधीको जिम्मेवारी सम्हाल्न पाउने छन् ।