पोखरा, कञ्‍चनपुर र डडेल्धुरामा जुवातास खेलिरहेको अवस्थामा ३२ जना पक्राउ

काठमाडौं- पोखरा महानगरपालिका-११ फुलबारी घर भइ सोही महानगरपालिका-९ बास्तोलाथर बस्‍ने रमेश गुरुङको बेलबोट रेष्टुरेन्टमा जुवातास खेलिरहेको अवस्थामा गुरुङसहित ६ जनालाई शुक्रबार बिहान प्रहरीले पक्राउ गरेको छ।

उक्त रेष्टुरेन्टमा जुवातास खेलाइरहेको भन्‍ने सूचना प्राप्त हुनसाथ जिल्ला प्रहरी कार्यालय कास्की र वडा प्रहरी कार्यालय वैदामबाट खटिएको प्रहरीले उनीहरूलाई नगद २ लाख ५१ हजार १ सय ३० रुपैयाँ र ५२ पत्ती तास सहित पक्राउ गरेको हो।

कञ्‍चनपुर, भिमदत्त नगरपालिका-१९ बागफाटा बस्ने ३६ वर्षीय दानी रानाको घरमा जुवातास खेलिरहेको अवस्थामा दानीसमेत १९ जनालाई गए राति प्रहरीले पक्राउ गरेको छ। उनको घरमा जुवातास खेलिरहेको भन्‍ने खबर प्राप्त हुनासाथ जिल्ला प्रहरी कार्यालय कञ्चनपुरबाट खटिएको प्रहरीले उनीहरूलाई नगद १ लाख २० हजार १ सय १२ रुपैयाँ र २ गड्डी तास सहित पक्राउ गरेको हो

डडेल्धुरा, अमरगढी नगरपालिका-५ तुफानडाँडास्थित दोस्ती वाइन सप (होटल)मा जुवातास खेलिरहेको अवस्थामा सोही सपका सञ्‍चालक ३७ वर्षीय गंगा दत्त भट्ट सहित ६ जनालाई  शुक्रबार साँझ प्रहरीले पक्राउ गरेको छ। 

उक्त सपमा जुवातास खेलाई रहेको भन्ने सूचनाको आधारमा जिल्ला प्रहरी कार्यालय डडेल्धुराबाट खटिएको प्रहरीले उनीहरूलाई नगद ८७ हजार ९ सय ७० रुपैयाँ सहित पक्राउ गरेको हो। यस सम्बन्धमा प्रहरीले थप अनुसन्धान गरिरहेको छ।