टेबलटेनिसमा स्यान्टुले दिलाए पुलिसलाई छैटौं स्वर्ण, चार प्रदेश पदकविहीन

पोखरा– पोखरामा जारी नवौं राष्ट्रिय खेलुकदअन्तर्गत नेपाल प्रहरी टिम च्याम्पियन भएको छ।

पोखरामा बुधबार सम्पन्न प्रतियोगितामा ६ स्वर्णसहित नेपाल प्रहरी टिम च्याम्पियन बनेको हो। प्रतियोगितामा ६ स्वर्ण, २ रजत र ४ काँस्य हात पार्न सफल भयो भने बलियो प्रतिस्पर्धीका रुपमा रहेको सशस्त्र प्रहरीले १ स्वर्ण, ४ रजत र १ काँस्य पदक पाउँदै दोस्रो स्थानमा रह्यो।

त्यस्तै, बागमती प्रदेशले १ रजत र २ काँस्यसहित तेस्रो भयो। प्रतियोगितामा आर्मीले २ काँस्य, एनआरएनएले २ काँस्य, प्रदेश १ ले २ काँस्य र गण्डकी प्रदेशले १ काँस्य पदक हात पारे।

बुधबार सम्पन्न महिला सिंगल्सको स्वर्ण पदक नवीता श्रेष्ठले हात पारेकी छन्। पदक विजेता श्रेष्ठले ११–८, ११–६, १२–१४, ११–८, ९–११, ६–११, १३–१५ को ३–४ सेटले एलिना महर्जनलाई पराजित गरेकी हुन्। प्रतिस्पर्धी खेलाडी दुवै नेपाल पुलिसका हुन्।

विजेता श्रेष्ठले पदकसहित नगद पुरस्कार २५ हजार रुपैयाँ पाउन सफल भइन् भने एलिनाले रजत पदक जितिन्। एपीएफकी सिक्का सुवाल र आर्मीकी रविना महर्जनले काँस्य जितिन्।

यसैगरी पुरुष सिंगल्सतर्फ स्यान्टु श्रेष्ठले स्वर्ण पदक पाउन सफल भए। नेपाल प्रहरीका स्यान्टु श्रेष्ठले एपीएफका रुविन महर्जनलाई ११–८, ११–७, ११–९, ६–११, ११–६ को ४–१ सेटले पराजित गरेका थिए। 

श्रेष्ठले पदकसहित नगद पुरस्कार २५ हजार रुपैयाँ पाउन सफल भए भने रुविनले रजतमा चित्त बुझाए। 

यसैगरी नेपाल प्रहरीका प्रदीप रोका र एपीएफका संयोग कपालीले काँस्य हात पारे। 

प्रतियोगितामा सहभागी मधेस प्रदेश, लुम्बिनी, कर्णाली र सुुदूरपश्चिम प्रदेशले भने पदक जित्न सकेनन्।

समापन कार्यक्रममा राष्ट्रिय खेलुकद परिषद्का सदस्य राजेश गुरुङ, अखिल नेपाल टेबलटेनिस संघ तथा नेपाल ओलम्पकि कमिटी उपाध्यक्ष चतुरानन्दराज वैद्य, अखिल नेपाल टेबलटेनिस संघ उपाध्यक्ष धर्ममान वज्राचार्य र कोल्मा बहाकोट तमु समाज अध्यक्ष सुवेदार लालबहादुर गुरुङले पदक तथा पुरस्कार वितरण गरेका थिए।