वालिङ- नवौं राष्ट्रिय खेलकुद प्रतियोगिता अन्तर्गत मंगलबार स्याङ्जाको वालिङमा भएको महिला फुटबल प्रतियोगितामा सेमीफाइनल खेल सकिएका छन्। मंगलबार भएको दोस्रो खेलमा एपीएफ क्लबले त्रिभुवन आर्मी क्लबलाई १-० गोल अन्तरले पराजित गरेको हो। दोस्रो हाफको ५६औँ मिनेटमा एपीएफकी सावित्रा भण्डारीले गरेको गोल नै निर्णायक बन्न पुग्यो।
मंगलबारको पहिलो सेमिफाइनलको खेलमा नेपाल पुलिस क्लब विजयी भएको छ। नेपाल पुलिस क्लबले प्रदेश नम्बर १ लाई ३-० को गोल अन्तरले पराजित गर्दै जित निकालेको हो।
खेलको १३औँ मिनेटमा पुलिस क्लबकी रेखा पौडेलले पहिलो गोल गर्दै आफ्नो टिमलाई अग्रता दिलाएकी थिइन्। लगत्तै खेलको १९औँ मिनेटमा निर्मला विकले दोस्रो गोल गरिन् भने ८०औँ मिनेटमा निर्मला उपाध्यले तेस्रो गोल गर्दै पुलिसको जित सुनिश्चित गरिन्।
फाइनल खेल बिहीबार बिहान ९ बजेदेखि हुने आयोजकले जानकारी दिएको छ।