महिला भलिबलमा एपीएफ, पुलिस, बागमती र गण्डकी सेमिफाइनलमा

म्याग्दी(बेनी)– नवौं राष्ट्रिय खेलकुदमा महिला भलिबल प्रतियोागितातर्फ एपीएफ, पुलिस, बागमती र गण्डकी प्रदेश सेमिफाइनलमा प्रवेश गरेका छन्। म्याग्दीको बेनीमा जारी प्रतियोगिताको पहिलो क्वाटरफाइनल खेलमा एपीएफले २५–१५, २५–१८, २५–१० को सेटमा लुम्वीनी प्रदेशलाई हराएको हो। 

यस्तै बागमतीले २५–१२, २५–१५ र २५–२३ को सेटमा सुदुरपश्चिमलाई हराएको हो। अत्यन्तै प्रतिस्पर्धात्मक बनेको तेस्रो क्वाटरफाइनल खेलमा नेपाल पुलिसले त्रिभुवन आर्मी क्लबलाई ३–२ को सेटमा हरायो। 

पुलिसले २५–१३, २५–२०, २३–२५ १४–२५ र १५–१३ को सेटमा हराएको हो। प्रतियोगिताको अन्तिम क्वाटरफाइनलमा गण्डकी प्रदेशले २५–१०, २५–१० र २५– १७ को सेटमा प्रदेश १ लाई हराउँदै अन्तिम चारमा प्रवेश गरेको हो। 

प्रतियोगितामा वुमन अफ द म्याच एपीएफकी आरती सुवेदी, नेपाल पुलिस क्लबकी टिम क्याप्टेन कमला पुन र प्रदेश १ की पुर्णीमा राई घोषित भइन्। मंगलबार दुई सेमिफाईनल हुने छन्। पहिलो सेमिफाईनलमा एपीएफ र बागमती प्रदेश तथा दोस्रो सेमिफाइनलमा नेपाल पुलिस क्लब र गण्डकी प्रदेश  भिड्दै छन्।