विष्णु पौडेलविरुद्ध उठेका राजु गुरुङको उम्मेदवारी यथावत

काठमाडौं- आगामी मंसिर ४ गते हुने प्रतिनिधि सभा र प्रदेश सभा निर्वाचनमा रुपन्देही-२ बाट उम्मेदवारी दिएका नेकपा एकीकृत समाजवादीका नेता राजु गुरुङको उम्मेदवारी यथावत रहेको छ। 

यसअघि नेकपा एमालेका नेताको टेलिफोनको भरमा उम्मेदवारी खारेज गरेको रुपन्देहीको प्रतिनिधि सभा निर्वाचन क्षेत्र नम्बर २ का निर्वाचन अधिकृत उद्‌विर नेपालीले सोमबार एक विज्ञप्ति जारी गर्दै उम्मेदवारी यथावत रहेको जानकारी गराएका हुन्। 

यसअघि निर्वाचन अधिकृतको कार्यालयले चेक बाउन्स प्रकरणमा उच्च अदालत पाटनमा मुद्दा चलिरहेको भन्दै गुरुङको उम्मेदवारी बदर गरेको थियो। निर्वाचन कार्यालयको उक्त निर्णय बदर गरी आफ्नो उम्मेदवारी कायम गर्न माग गर्दै गुरुङले सर्वोच्च अदालतमा रिट निवेदन दायर गरेका थिए।

न्यायाधीश विश्वम्भरप्रसाद श्रेष्ठको एकल इजलासले गुरुङको उम्मेदवारी खारेज गर्ने मुख्य निर्वाचन अधिकृतको निर्णय कार्यान्वयन नगर्न अल्पकालीन अन्तरिम आदेश दिएको हो। साथै, सर्वोच्चले अन्तरिम आदेशका निरन्तर हुने वा नहुने भन्‍ने विषयमा छलफल गर्न दुबै पक्षलाई कात्तिक २ गते बोलाएको छ।

अब कात्तिक २ गते सर्वोच्चको संयुक्त इजलासले आइतबार एकल इजलासबाट जारी अल्पकालीन आदेशलाई निरन्तरता दिए गुरुङको उम्मेदवारी कायम रहने छ। तर, संयुक्त इजलासले अन्तरिम आदेश जारी गर्न अस्वीकार गरेमा गुरुङ उम्मेदवार बन्‍न पाउने छैनन् ।

नेकपा एमालेका उपाध्यक्ष बिष्णु पौडेलसँग प्रतिस्पर्धा गर्न रुपन्देही-२ मा नेपाली कांग्रेससहितको गठबन्धनका तर्फबाट गुरुङले उम्मेदवारी दिएका थिए। निर्वाचन अधिकृतको कार्यालयले पूर्वाग्रही भएर उजुरी नै नपरी गुरुङको उम्मेदवारी खारेज गरको भन्दै सत्ता गठबन्धनले विरोध गरेको थियो।