पोखरा- क्रस कन्ट्री प्याराग्लाइडिङ खेल चलिरहेको अवस्थामा अकस्मात् प्याराग्लाइडिङ भूइँमा खस्दा एक जनाको ज्यान गएको छ।
पोखरा महानगरपालिका-१८ सराङ्कोटस्थित नवौं राष्ट्रिय खेलकुद प्रतियोगिता अन्तर्गत क्रस कन्ट्री प्याराग्लाइडिङ खेल चलिरहेको अवस्थामा ब्लु स्काई कम्पनीको प्याराग्लाइडिङ खसेको हो।
आकाशमा उडिरहेको अवस्थामा अकस्मात् १०० मिटरमाथिबाट जमिनमा प्याराग्लाइडिङ खसेको प्रहरीले जनाएको छ। दुर्घटनामा नेपाल त्रिभुवन आर्मी क्लबको तर्फबाट भाग लिएका कास्की पोखरा-१० अस्पताल चोकका २६ वर्षीय निसिम थापा रहेका छन्।
घाइते भएका थापालाई उपचारको लागी मेट्रोसिटी अस्पताल पठाएकोमा उनको शनिबार दिउँसो उपचारकै क्रममा १२:४५ बजे मृत्यु भएको प्रहरीले जनाएको छ। प्रहरीका अनुसार प्याराग्लाइडिङ शनिबार बिहान ११:३० बजे खसेको थियो।