पोखरा- सर्वाधिक पाँच स्वर्ण जितिसकेको त्रिभुवन आर्मी क्लबले जारी नवौं राष्ट्रिय खेलकुदअन्तर्गत पुरुष ह्यान्डबलको पनि फाइनलमा स्थान बनाएको छ।
हिजो भएको सेमिफाइनला खेलमा आर्मीले फाइनलमा स्थान बनाएको हो। आर्मीसँगै गण्डकी प्रदेशले पनि पुरुष ह्यान्डबलको फाइनलमा स्थान बनाएको छ।
गण्डकीले लुम्बिनीलाई ५४-२१ गोलअन्तरले पराजित गर्दै फाइनल पुगेको हो। खेलमा क्रममा गण्डकीका चन्द्र थापाले सर्वाधिक १८ गोल गरे।
अर्को सेमिफाइनलमा आर्मीले अर्को विभागीय टोली एपीएफलाई २७-२२ ले हराउँदै फाइनलमा स्थान बनायो। एपीएफका सन्दीप कार्कीले सर्वाधिक ७ गोल गरे।
फाइनल गण्डकी र आर्मीबीच शनिबार (आज) दिउँसो ४ बजे हुनेछ। त्यसअघि, एपीएफ र लुम्बिनीबीच विहान ८ बजे तेस्रो स्थानका लागि खेल हुनेछ।
महिला आर्मी र एपीएफ फाइनलमा पुगे। पोखरा रंगशालास्थित बहुउद्देश्यीय कभर्डहलमा भएको पहिलो सेमिफाइनल खेलमा एपीएफले प्रदेश-१ माथि २९-६ को सहज जित दर्ता गर्यो। एपीएफकी उमा राईले सर्वाधिक ७ गोल गरिन्।
आर्मीले घरेलु टोली गण्डकीलाई २४-९ ले हरायो। आर्मीकी कल्पना ओलीले सर्वाधिक सात गोल गरिन्।
आर्मी र सशस्त्रबीच शनिबार दिउँसो २ बजे फाइनल खेल हुनेछ। त्यसअघि, गण्डकी र प्रदेश-१ बीच तेस्रो स्थानका लागि विहान १० बजे खेल हुनेछ।