उपराष्ट्रपतिले गरे नवौं राष्ट्रिय खेलकुदको उद्घाटन

पोखरा- नवौं राष्ट्रिय खेलकुदको औपचारिक रूपमा उद्घाटन भएको छ। शुक्रबार अपराह्न उपराष्ट्रपति नन्दबहादुर पुनले पोखरा रंगशालामा राष्ट्रिय खेलकुद उद्घाटन गरेका हुन्। 

उद्घाटन समारोहमा विभिन्न सांस्कृतिक समूहले झाँकी प्रस्तुत गरेका थिए। त्यस्तै प्रतियोगितामा सहभागी हुने टिमहरूले मार्चपाससमेत गरेका थिए। उद्घाटन समारोहको अन्त्यमा आतिशबाजी हुनेछ। आतिशबाजीका लागि भारतबाट प्राविधिक पोखरा आएका छन्। रंगशालालाई सिँगारिएको छ।

रातमा पनि रंगशालालाई आकर्षक बनाउन लेजर लाइटको प्रयोग गरिएको छ। विभिन्न विद्यालयका विद्यार्थी, सेना, सशस्त्र प्रहरी, नेपाल प्रहरी, खेलाडी र खेल पदाधिकारीको सहभागिताले उद्घाटन स्मरणीय भएको राष्ट्रिय खेलकुद परिषद्ले जनाएको छ।