काठमाडौं– गण्डकी प्रदेशको पोखरामा भइरहेको नवौं राष्ट्रिय खेलकुद प्रतियोगिताको पुरुष फुटबल खेलमा गैरआवासीय नेपाली संघ (एनआरएनए)ले विजयी सुरुआत गरेको छ।
पोखराको याम्दीस्थित गोस्तेघाट खेलमैदानमा बिहीबारदेखि सुरु भएको खेलमा एनआरएनएले प्रदेश १ लाई २–० अन्तरले पराजित गर्दै विजयी सुरुआत गरेको हो।
एनआरएनएको जितमा विमल घर्तीमगर र सञ्जोग राईले गोल गरे। विमलले खेलको आठौं मिनेटमा गोल गर्दै एनआरएनएको खाता खोलेका थिए। दोस्रो गोल एनआरएनएका सञ्जोगले दोस्रो हाफको ५५औं मिनेटमा गरे। प्रतियोगिताअन्तर्गत बिहीबार बागमती र मधेस प्रदेशबीच केही बेरमा खेल सुरु हुनेछ।