एपीएफको लगातार दोस्रो जित, खराब लयमा गण्डकी

काठमाडौं–  बिहीबार पोखरा रंगशालामा एपीएफ क्लवले गण्डकी प्रदेशलाई ९ विकेटले हराएको छ। नवौं राष्ट्रिय महिला क्रिकेट प्रतियोगिता अन्तर्गत भएको खेलमा गण्डकीले प्रस्तुत गरेको २७ रनको सामान्य लक्ष्य एपीएफले १ सय ६ बल बाँकी रहँदै पूरा गरेर जित निकालेको हो।

घरेलु क्रिकेटमा सधैको उपाधि दावेदार एपीएफको तर्फबाट सिता राना मगरले पाँच बलमा दुई चौका प्रहार गर्दै १२ रन जोडिन्। इन्दु बर्माले ३ बलमा दुई चौका सहित नौ रन बनाइन्।

यता खराब लयबाट गुज्रिरहेको गण्डकीले पहिला व्याटिङ गर्दै १८.२ ओभरमा सम्पूर्ण विकेट गुमाएर २६ रन बनाएको थियो। गण्डकीका कुनै पनि खेलाडीले दोहोरो आँकडाको योगफल तयार पार्न सकेनन्। श्रृष्टि जैशीले बनाएको ५ रन नै गण्डकीको सर्वाधिक बन्न पुग्यो।

एपीएफको बलिङमा प्लेयर अफ द म्याच इन्दु बर्माले ३ ओभरमा ४ रन खर्चिएर २ विकेट लिइन्। त्यस्तै, सुमन विष्ट, नेरी थापा, निशा भट्ट र सिता रानामगरले १–१ विकेट लिए। गण्डकीकी श्रृष्टी जैशिले १ विकेट लिइन्।

जितसँगै चार अंक बनाएको एपीएफ ग्रुप ए को शिर्षस्थानमा पुगेको छ। उसले दुवै  खेलमा जित निकालेर ४ अंक जोडेको हो।

प्रतियोगितामा अहिले मधेश प्रदेश र सुदुर पश्चिम प्रदेशविचको खेल भइरहेको छ।