लुम्बिनीबाट ओलम्पिक टर्च र्‍याली सुरु

लुम्बिनी- नवौं राष्ट्रिय खेलकुद प्रतियोगितामा भाग लिने ओलम्पियन खेलाडीले लुम्बिनीबाट ओलम्पिक टर्च र्‍याली लिएर बिहीबार पोखरातर्फ प्रस्थान गरेका छन्। 

लुम्बिनी विकास कोषका सदस्य सचिव सानुराजा शाक्यले ओलम्पियन टर्च र्‍यालीका संयोजक उमेश मास्केलाई शान्तिदीपबाट टर्चबालेर हस्तान्तरण गरेका हुन्। मास्केको संयोजकत्वमा राष्ट्रिय खेलकुद प्रतियोगितामा भाग लिने सात सदस्यीय टोलीले शान्तिदीपबाट दीगो (टर्च) लिएर शुक्रबार पोखरा पुग्नेछ। 

खेलाडीले बिहीबार बिहान शान्तिदीपबाट टर्च लिएर लुम्बिनी मायादेवी मन्दिर परिसर परिक्रमा गरी  पोखरातर्फ गएका छन्। लुम्बिनी विकास कोषका तर्फबाट खेलाडीलाई स्वागत गरिएको थियो। 

उक्त अवसरमा लुम्बिनी विकास कोषका सदस्य सचिव सानुराजा शाक्यले खेलाडीलाई सफलताको शुभकामना दिए। नेपाल खोखो संघका महासचिवसमेत रहेका सदस्य सचिव शाक्यले लुम्बिनीको पवित्रभूमिबाट लिएर जाने शान्तिदीपबाट लिएर गएको टर्चले नवौं राष्ट्रिय खेलकुदमा सहभागी खेलाडीमा उत्साह थपिने बताए। 

ओलम्पियन टर्च र्‍यालीका संयोजक उमेश मास्केले लुम्बिनी शान्ति दीपबाट लगिएको दीगो पोखराका ओलम्पियनमाझ पुर्‍याएर ऊर्जा थप्ने विश्वास लिए। 

खेलाडीलाई लुम्बिनी विकास कोषका सदस्य सचिव शाक्य, प्रमुख प्रशासकीय अधिकृत ज्ञानिन राई, पुरातत्व शाखा प्रमुख हिमाल उप्रेती, लुम्बिनीका पर्यटन व्यवसायीले खादा लगाएर स्वागतसहित सफलताको शुभकामना दिएका थिए।  राष्ट्रिय खेलकुदअन्तर्गत गण्डकी प्रदेशका विभिन्न ठाउँमा विधागत खेल भइरहेका छन्।