डडेलधुरामा एमालेको उम्मेदवारी फिर्ता, कर्ण मल्ललाई सघाउने

काठमाडौं– डडेलधुरामा प्रतिनिधिसभातर्फ नेकपा एमालेको तर्फबाट उम्मेदवारी दिएका चक्र स्नेहीले उम्मेदवारी फिर्ता लिएका छन्। यससँगै बीपी कांग्रेसका कर्ण मल्ललाई सघाउने एमालेको निर्णय कार्यान्वयन हुने भएको छ।

केन्द्रबाट नै स्नेहीको उम्मेदवारी फिर्ता गर्न पहल भएको थियो। यसैगरी, कांग्रेसका बागी उम्मेदवार दानबहादुर पाल र राष्ट्रिय प्रजातन्त्र पार्टी नेपालका कालिप्रसाद जोशीले पनि उम्मेदवारी फिर्ता लिएका छन्।

एकीकृत समाजवादीबाट भर्खरै एमालेमा फर्केर स्वतन्त्र उम्मेदवारी दिएका विक्रमबहादुर शाहीको उम्मेदवरी भने कायम छ।प्रदेशसभा क मा कांग्रेस बीपीका गणेशप्रसाद जोशी र ख मा राष्ट्रिय प्रजातन्त्र पार्टी नेपालका जयराज अवस्थीले उम्मेदवारी फिर्ता लिएका छन्। एमालेलाई सघाउन जोशीले उम्मेदवारी फिर्ता लिएका हुन्।

डडेलधुरामा प्रधानमन्त्री तथा कांग्रेस सभापति शेरबहादुर देउवासहित ८ जना उम्मेदवार प्रतिनिधिसभातर्फ कायम भएका भएका छन्। देउवासँगै नेपाली कांग्रेस बीपीबाट कर्णबहादुर मल्ल, एमालेबाट बागी विक्रम शाही, राप्रपाबाट गोविन्द खडायत,  जनता समाजवादी पार्टीबाट श्याम सिनाल, स्वतन्त्रबाट कर्णसिंह रावल, सागर ढकाल र लालबहादुर कठायत उम्मेदवार छन्।