दिगम्बर झाको पुनः नियुक्ति किन लुकाउन खोजियो ? 

काठमाडौं- सरकारले नेपाल दूरसञ्चार प्राधिकरणको अध्यक्षमा दिगम्बर झा पुनः नियुक्त गरेको छ । बिहीबार बेलुका बसेको मन्त्रिपरिषद्को बैठकले उनको नियुक्तिका विषयमा निर्णय लिएको हो । 

तर, मन्त्रिपरिषद्को बैठकबारे जानकारी गराउदा यो निर्णयका विषयमा केहि पनि बोलिएन् । सरकार प्रवक्ता सूचना तथा सञ्चार प्रविधि मन्त्री गोकुल बाँस्कोटा देशबाहिर रहेकाले  युवा तथा खलकुद मन्त्री जगत विश्वकर्माले पत्रकारहरुलाई मन्त्रिपरिषद्को निर्णयबारे जानकारी दिएका थिए । 

उनले  संयुक्त राष्ट्रसंघ शान्ति स्थापनार्थ साझा घोषणा पत्रमा समर्थन गर्नेदेखि जर्मन सरकारको ४ अर्ब ९ करोड रुपैया अनुदान सहायता स्वीकार गर्ने निर्णण भएकोसम्म जानकारी गराए पनि झाको नियुक्ति बारे केहि बोलेनन् । तर, नाम नखुलाउने सर्तमा एकमन्त्रीले झालाई पुनः दूरसञ्चार प्राधिकरणमा नियुक्त गर्ने निर्णय भएको नेपाल समयलाई जानकारी दिए । 

देउवा सरकारले नियुक्त गरेका सबैलाई एकमुष्ट हटाउने क्रममा बर्खास्तीमा परेका झालाई सरकारले पुनः नियुक्त गरेको हो । उनी ४ वर्षका लागि नियुक्त भएका हुन् । सञ्चार, सूचना तथा प्रविधि मन्त्रालयका सचिव महेन्द्रमान गुरूङ संयोजक रहेको सिफारिस समितिले गरेको सिफारिसअनुसार झा प्राधिकरणमा दोहोरिएका हुन् ।

समितिले झासँगै पूर्व सचिव सुशील घिमिरे र प्राधिकरणका वरिष्ठ निर्देशक पुरूषोत्तम खनाललाई अध्यक्षका लागि सिफारिस गरेको हो ।