पोखरा- नवौं राष्ट्रिय खेलकुद प्रतियोगिता अन्तर्गत दोस्रो दिन फेन्सिङ एकल सेवरतर्फ एपिएफका राजेन्द्र गजुरेल, महिलातर्फको फोयलमा आर्मीकी रमा सिंह र पुरुष तर्फको इपिमा बागमती प्रदेशका ओमकार सिंहले स्वर्ण पदक जितेका छन्।
सशस्त्र प्रहरीको विभागीय टिम एपिएफका गजुरेलले क्लबका लागि पहिलो स्वर्ण जितेका हुन्। यस अगाडी ७ औ राष्ट्रिय खेलकुदमा टिम इभेन्टमा रजत जितेका उनले ८ औं मा टिम र एकल दुई विधामा रजत पदक जितेका थिए।
त्यस्तै, सेवरमा नेपाल आर्मीका उपेन्द्रबहादुर शाहीले रजत पदक जितेका छन्। आर्मीकै रघुविर चन्द्र र एपिएफका खेमराज खत्रीले कास्य पदकमा चित्त बुझाए।
महिला तर्फको फोयलमा स्वर्ण पदक विजेता सिंहले ७ औ राष्ट्रिय खेलकुदमा स्र्वण र ८ औंमा रजत पदक जितेकी थिइन्। एपिएफकी मनिषा राईले रजत पदक र एपिएफकी मनिसा थापा र अनिता अधिकारीले कास्य पदक हात पारे।
पुरुष तर्फका इपिमा स्वण जित्ने सिंहले ८ औंमा पनि स्वर्ण पदक जितेका थिए। इपिमा आर्मीका राम थापाले रजत पदक जिते। त्यसै गरी गण्डकी प्रदेशका विजय अधिकारी र एपिएफका मिन कार्कीले कास्य पदक जित्न सफल भएका छन्। गण्डकी प्रदेशका अधिकारीले पहिलो पदक जित्न सफल भएका हुन्।
फेन्सिङको अंक तालिका अनुसार आर्मी शीर्षस्थानमा छ। उसले दुई स्वर्ण, ३ रजत र ४ कास्य सहित ९ पदक प्राप्त जितिसकेको छ। यता बागमतीले २ स्वर्ण, १ रजत र १ कास्य सहित ४ पदक प्राप्त गरेको छ।
शसस्त्र प्रहरी १ स्वर्ण, २ रजत र ६ कास्य सहित ९ पदक जितेर तेस्रो स्थानमा आफ्नो बनाएको छ। सुदूरपश्चिम प्रदेश १ स्वर्ण पदक सहित चौथो स्थान छ भने आयोजक गण्डकी प्रदेश १ कास्यसहित पाचौं स्थानमा छ। प्रदेश नम्बर एकले अहिले सम्म पदक जित्न सकेका छैन।
प्रतियोगिताका विजयी खेलाडीलाई राष्ट्रिय खेलकुद परिषदका सदस्य सचिब टंकलाल घिसिङ लगाएतले पदक वितरण गरेका थिए।