चुनावअघिको गठबन्धन लुटतन्त्र: गजुरेल

बुटवल– नेकपा क्रान्तिकारी माओवादीका कार्यवाहक महासचिव सीपी गजुरेलले सरकारमा रहेका दलहरुले चुनावअघि नै गठबन्धन गरेर जानु लोकतन्त्र नभई लुटतन्त्र भएको नेता बताएका छन्। 

देशभक्त जनगणतान्त्रिक मोर्चा नेपालले मंगलबार बुटवलमा गरेको पत्रकार सम्मेलनमा नेता गजुरेलले यस्तो बताएका हुन्। चुनावपछि कुनै दलको बहुमत नआए ठूलो दलले बहुमत पुर्याउन गठबन्धन गर्नु स्वाभाविक भए पनि चुनावअघिको गठबन्धन गलत भएको उनले बताए।

संविधान नै त्रुटिपूर्ण रहेकाले चुनावमा भाग लिएर जनताको पक्षमा काम गर्न नसकिने उनले बताए। नेता गजुरेलले माओवादी केन्द्रका अध्यक्ष पुष्पकमल दाहाल प्रचण्ड नायकबाट खलनायकमा रुपान्तरण भएको आरोप समेत लगाए।

माओवादीको मुख्य एजेण्डा जनगणतन्त्र स्थापना गर्नु भएको र त्यसैका लागि संविधानसभा चुनावबाट संविधान बनाउन शान्तिपूर्ण राजनीतिमा आए पनि प्रचण्डले आफ्ना एजेण्डाहरु छाड्दै गएको उनले बताए। युद्धकालमा भारतविरुद्ध सुरुङ युद्ध गर्ने भनेका प्रचण्ड सरकारमा गएपछि राष्ट्रियताका एजेण्डा छाड्दै गएको गजुरेलको भनाइ छ।