छोराको शव जल्दै गर्दा बुबासहित १३ जना मलामी पहिरोले पुरिए

काठमाडौं– शनिबार कालिकोटको तिलागुफा नगरपालिका–४ का १८ वर्षीय हेमराज शाहीको शव जल्दै थियो राचुली नदी किनारमा। मुटुरोगी शाहीको सोही दिन बिहान मृत्यु भएको थियो। भारी वर्षाका बीच गाउँका करिब ६० जना मलामी गएका थिए। गत सातादेखि नै कालिकोटमा लगातार वर्षा भइरहेको थियो। मलामीमा थिए मृतक हेमराजका बुबा पनि। 

तिलागुफा–४ राचुलीमा नदी किनारमा हेमराजको शवमा दागबत्ती दिइयो। दागबत्ती दिए हेमराजकै ६० वर्षीय बुबा कालीबहादुर शाहीले। चिता जल्दाजल्दै माथिबाट पहिरो खस्यो। मलामीहरुबीच भागदौड भयो। चिता नजिकै थिए हेमराजका बुबा। उनीसहित १३ जनालाई पहिरोले पुर्यो।

स्थानीय प्रहरीका अनुसार सोही पहिरोले १० भन्दा बढी घर पनि बगाएको छ। चार घण्टा पैदल हिँडेर प्रहरी टोली घटनास्थल पुगेको छ र बेपत्ता भएकाहरुको खोजी कार्य जारी छ।

प्रहरीका अनुसार बेपत्ता हुनेमा तिलागुफा नगरपालिका–४ राँचुलीका ४७ वर्षीय कालीबहादुर शाही, ६३ वर्षीय धनबहादुर शाही, ३६ वर्षीय क्षेत्रजंग शाही, २८ वर्षीय खगेन्द्र शाही, २३ वर्षीय भेषबहादुर शाही, ५५ वर्षीय धनबहादुर शाही, ७६ वर्षीय अली शाही, २३ वर्षीय खेमराज शाही, ५७ वर्षीय मानबहादुर शाही, ४१ वर्षीय मोतिलाल शाही, ५६ वर्षीय परबहादुर शाही, २४ वर्षीय नरेश शाही र २२ वर्षीय प्रशान्त शाही रहेका छन्। बेपत्ता हुनेहरु मृतकका नजिकका आफन्त र नातागोताका बढी छन्।