पोखरा- पोखरामा आइतबारबाट सुरु भएको राष्ट्रिय महिला क्रिकेट प्रतियोगितामा बागमती प्रदेशले जित निकालेको छ। नवौं राष्ट्रिय खेलकुदअन्तर्गतको महिला क्रिकेटमा बागमती प्रदेशले सुदूरपश्चिम प्रदेशलाई ८ विकेटले हराएको हो।
टस हारेर पहिले ब्याटिङको अवसर पाएको सुदूरपश्चिमले १८ ओभर दुई बलमा सबै विकेट गुमाएर ७१ रन बनाएको थियो। जवाफमा बागमतीले दुई विकेट मात्र गुमाएर १३ ओभर एक बलमै ७२ रनको लक्ष्य पूरा गरेको हो।
बागमतीलाई जित दिलाउनका लागि कन्चन श्रेष्ठले सर्वाधिक २५ रन बनाइन् भने सुमन खतिवडाले ११ रन बनाइन्। यता सुदूरपश्चिमकी यशु चौधरीले एकमात्र विकेट लिइन्।
खेलको पहिलो पारीमा सुदूरपश्चिमकी अनु कडायतले २२ रन र रुवी पोदारले १२ रन बनाउनुबाहेक अन्य खेलाडीले दोहोरो अंकमा रन बनाउन सकेनन्। बाँकी खेलाडीले कमजोर प्रदर्शन गरे।
बागमतीकी सोनी पाख्रिनले पाँच विकेट लिइन् भने खुसी डंगोलले दुई विकेट गिराइन्। कृष्मा थामी र अस्मिता खरेलले समान १–१ विकेट लिए। यो जितसँगै बागमतिले २ अंक जोडेको छ। आजै भएको खेलमा मधेश प्रदेशले गण्डकीलाई ४० रनले हराएको थियो।