सातौंपटक सांसद बन्न देउवाले दर्ता गराए उम्मेदवारी

काठमाडौं– प्रधानमन्त्री तथा नेपाली कांग्रेसका सभापति शेरबहादुर देउवाले आगामी मङ्सिर ४ गते हुने प्रतिनिधिसभा निर्वाचनका लागि डडेल्धुराबाट उम्मेदवारी दर्ता गराएका छन्।

उनले प्रतिनिधिसभा सदस्यका लागि आज सातौं पटक उम्मेदवारी दर्ता गराएका हुन्। प्रधानमन्त्री देउवाको तर्फबाट उनकी पत्नी एवं नेपाली कांग्रेसकी नेतृ डा आरजु राणा देउवाले मनोनयन दर्ता गराएकी हुन्। उम्मेदवारी दर्ताका लागि वारिसनामासहित प्रधानमन्त्री पत्नी राणा शनिबार बेलुका नै डडेल्धुरा पुगेकी थिइन्।

देउवा डडेल्धुराबाट २०४८ सालमा पहिलो पटक प्रतिनिधिसभा सदस्य निर्वाचित भएका थिए। उनी त्यसयताका सबै निर्वाचनमा सोही निर्वाचित हुँदै आएका छन्।

उनी प्रतिनिधिसभाका लागि भएको पछिल्लो २०७४ सालको निर्वाचनमा डडेल्धुराबाट नै छैटौं पटक निर्वाचित भएका थिए। २०४८ यताका सबै निर्वाचनमा विजयी भएका देउवा आसन्न निर्वाचनमा पनि डडेल्धुराका जनताको साथ, समर्थन र मायाले आफ्नो इतिहासलाई कायम राख्दै निरन्तरता दिने पत्नी आरजुले बताइन्।

यसअघि २०४८, २०५१, २०५६, २०६४, २०७० र २०७४ मा भएका निर्वाचनमा डडेलधुराबाट विजयी देउवा २०६४ मा कञ्चनपुर–४ र २०७० मा कैलाली–६ बाट पनि विजयी भएका थिए। 

उनी २०४८ मा सांसद बनेपछि गृहमन्त्री भएका थिए। २०५१ को मध्यावधि निर्वाचनपछि बनेको मनमोहन अधिकारी नेतृत्वको सरकार अल्पमतमा परेपछि २०५२ सालमा देउवाको नेतृत्वमा नै सरकार गठन भएको थियो। त्यसपछि २०५९, २०६१, २०७४, २०७८ मा गरी उनी पाँच पटक प्रधानमन्त्री भइसकेका छन्।

आगामी मङ्सिर ४ गतेको निर्वाचनमा देउवालाई हालको सत्ता साझेदार गठबन्धनको पनि समर्थन रहेको छ। देउवासँगै तीन पटक प्रतिस्पर्धा गरेका नेकपा माओवादीका खगराज भट्ट अहिले प्रदेशसभाका लागि गठबन्धनबाटै चुनाव लड्दैछन्।