प्रदेश १ मा माओवादीबाट को-को बने उम्मेदवार?

विराटनगर- आगामी मंसिर ४ गते हुने प्रदेश र प्रतिनिधिसभा निर्वाचनका लागि नेकपा माओवादीले आफ्नो भागमा परेको प्रतिनिधिसभाका ८ मध्ये ६ र प्रदेशसभाका १७ मध्ये १३ जना उम्मेदवारको टुंगो लगाएको छ। 

प्रतिनिधिसभामा ८ सिट पाएको माओवादीले ताप्लेजुङमा खेलप्रसाद बुढाक्षेत्री, मोरङ ४ मा अमनलाल मोदी र ५ मा शिबकुमार मण्डल उम्मेदवार बनेका छन्। उनीहरु दुबै यसअघिको निर्वाचनमा सोही क्षेत्रबाट निर्वाचित भएका थिए। सुनसरी १ मा  मुक्साहाङ मेन्याङ्बोलाई उम्मेदवार बनाएको छ। भोजपुरमो निवर्तमान सांसद सुदन किरातीलाई उम्मेदवार बनाएको छ। खोटाङमा प्रदेशका बहालवाला मन्त्री रामकुमार राई कि केन्द्रीय सदस्य समिता कार्कीलाई उम्मेदवार बनाउने भन्ने निर्णय हुन बाँकी रहेको बताईएको छ। माओवादीको भागमा परेको भनिएको सोलुखुम्बुमा भने काँग्रेसको दावी कायमै रहेकोले अन्तिम टुंगो लाग्न बाँकी छ। झापा २ मा पनि टुङ्गो लाग्न बाँकी छ। 

प्रदेश सभाका १७ क्षेत्र मध्ये  पाँचथरको (ख)  बाट प्रदेश सरकारका आर्थिक मामिला तथा योजनामन्त्री इन्द्रबहादुर आङ्बो, झापा ३( ख) बाट निवर्तमान सांसद पूर्णसिंह राजवंशी, झापा ४ (क) बाट प्रदेश सरकारका कृषिमन्त्री झलकसिंह दर्लामी, झापा ५ (२) बाट गगन पुरी उम्मेदवार बन्ने भएका छन्।  मोरङ १(क) बाट कुलप्रसाद साम्बा, मोरङ २(क) बाट गणेश उप्रेती, मोरङ ६(क) बाट जीवन आचार्य, सुनसरी २(क) बाट इटहरीका निवर्तमान मेयर द्वारिकलाल चौधरी, सुनसरी ३(क) बाट प्रदेशकी उपसभामुख सरस्वती पोखरेल, धनकुटा (ख) बाट कुशुमकुमारी श्रेष्ठ र तेह्रथुम (ख) बाट दुर्गा चापागाई उम्मेदवार बन्ने भएका छन्। 

सोलुखुम्बुबाट कज्र्याङ शेर्पा, उदयपुर १(क) बाट नारायण बुर्जा मगर र उदयपुर २(क) बाट राजन किराती उम्मेदवार बन्ने भएका छन्। माओवादीको भागमा परेको इलाम २(ख), झापा १ (ख), संखुवासभा (क) र ओखलढुंगा (ख) को उम्मेदवार भने फाइनल भइ नसकेको पार्टीले जनाएको छ। आइतबार उम्मेदवारी दर्ता भएकाले राजनीतिक दलहरुले उम्मेदवारको टुङ्गो लगाउँदै गएका छन्।