कैलालीमा भारी वर्षा, धनगढी बजार जलमग्‍न

धनगढी- बुधबारदेखिको अविरल वर्षाका कारण कैलालीका विभिन्‍न स्थानमा डुबान भएको छ। वर्षाका कारण प्रदेशको अस्थायी राजधानी धनगढी बजार क्षेत्र जलमग्‍न बनेको छ भने दसैंको टिका थाप्‍न हिँडेका नागरिकलाई आउजाउ गर्न समस्या भएको छ। 

जिल्ला प्रहरी कार्यालय कैलालीका अनुसार वर्षाका कारण हालसम्म कुनै क्षतिको विवरण भने आएको छैन। ‘अहिले सम्म वर्षाका कारण कुनै क्षति घटना भएको रिपोर्ट भएको छैन,’ जिल्ला प्रहरी कार्यालय कैलालीका प्रवक्ता प्रहरी नायब उपरीक्षक वेदप्रकाश जोशीले भने, ‘अहिले सबै क्षेत्रको विवरण बुझ्‍न टोली परिचालन गरिएको छ।’

जल तथा मौसम पूर्वानुमान महाशाखाका अनुसार बिहीबारदेखि मनसुनी वायु सुदूरपश्चिम प्रवेश गरेको छ। जसका कारण बिहीबारदेखि शनिबारसम्म नै अधिकांश क्षेत्रमा भारी वर्षाको सम्भावना छ।

‘बिहीबार रातिदेखि सुदूरपश्चिमका अधिकांश स्थानमा मध्यमदेखि भारी वर्षाको सम्भावना रहेको छ,’ मौसमविद सञ्जिव अधिकारीले भने, ‘शुक्रबार प्रदेशका धेरै स्थानमा वर्षा हुने र शनिबार अधिकांश स्थानमा वर्षा हुनका साथै केही स्थानमा भारी वर्षाको सम्भावना रहेको छ।’ सुदूरपश्चिममा आगामी सोमबारसम्म नै मौसम प्रतिकूल रहने अनुमान गरिएको उनले बताए।