गोठाटार गोलीकाण्ड : हत्यामा संलग्न तीन जनालाई सार्वजनिक गर्ने प्रहरीको तयारी

काठमाडौं- काठमाडौंको गोठाटारमा गत ३ असोजमा चलेको गाोलीकाण्डमा संलग्न तीन जना आरोपिलाई प्रहरीले पक्राउ गरेको जनाएको छ। प्रहरी उच्च स्रोतका अनुसार उनीहरूलाई भारतबाट पक्राउ गरेर नेपाल ल्याइएको हो।

पक्राउ परेकाहरूलाई आज काठमाडौं परिसरले सार्वजनिक गर्ने तयारी गरेको प्रहरी स्रोतको भनाइ छ। अहिले पक्राउ परेका अभियुक्तहरूको विवरण भने गोप्य राखिएको छ।

'हामीले भारतबाट तीन जना अभियुक्तलाई पक्राउ गरेका छौं। उनीहरूलाई आज सार्वजनिक गर्ने छौं। त्यति खेरै अभियुक्त बारेमा जानकारी दिइने छ', प्रहरी स्रोतले भन्यो।

सर्लाहीका व्यापारी लाल महम्मद दर्जीको कागेश्वरी मनोहरा नगरपालिका ८ गोठाटारस्थित कृष्ण मन्दिर नजिकै ३ असोजमा हत्या भएको थियो। मोटरसाइकलमा आएका व्यक्ति महम्मदलाई गोली हानेर फरार भएका थिए।

भारतीय गुण्डा नितिन मदनको योजनामा उनको हत्या भएको प्रहरी अनुसन्धानबाट खुलेको थियो। तर, आज नितिनलाई प्रहरीले पक्राउ गरेको छ वा छैन भन्ने बारेमा खुल्न सकेको छैन।