मन्दिर पस्दा दलितमाथि कुटपिट गरेको आरोपमा वडाध्यक्षसहित ३ विरुद्ध जाहेरी

बाजुरा- मन्दिर प्रवेश गरेका दलित समुदायका व्यक्तिमाथि कुटपिट गरेको आरोपमा वडाध्यक्षसहित तीन जनाविरुद्ध प्रहरीमा जाहेरी दर्ता भएको छ। त्रिवेणी नगरपालिका-७ मा रहेको नाटेश्वरी मन्दिरमा प्रवेश गरी पूजापाठ गरेको भन्दै टेकेन्द्रसिंह सुनारमाथि कुटपिट गरेको आरोपमा उनीहरूविरुद्ध जाहेरी दर्ता भएको हो। 

बाजुरा जिल्ला त्रिवेणी नगरपालिका-७ कै वडाध्यक्ष जुद्धबहादुर अयडी, सोही स्थानका रंगलाल पाध्याय र विनोद अयडीले ती दलितमाथि कुटपिट गरेको आरोप जाहेरीमा छ। वडाध्यक्षलाई भने पक्राउ गरिएको जिल्ला प्रहरी कार्यालय बाजुराले जानकारी दिएको छ। गत वैशाखमा सम्पन्न स्थानीय तहको निर्वाचनमा अयडी नेपाली कांग्रेसबाट वडाध्यक्षमा निर्वाचित भएका थिए। रंगलाल र विनोद हालसम्म फरार छन्। 

उनीहरुमाथि जातीय भेदभाव तथा छुवाछुतसम्बन्धी कसुरमा अनुसन्धान हुनुपर्ने माग गरिएको छ। नवरात्रमा पूजा गर्न कन्चनपुरबाट सुनार बाजुराको उक्त मन्दिर पुगेका थिए।