फुटपाथमा पैदलयात्रीको पहिलो अधिकारः काठमाडौं महानगर

काठमाडौं– काठमाडौं महानगरपालिकाले सडक किनारामा निर्वाध हिँड्न पाउने पैदल यात्रीको अधिकार स्थापित गराउन महानगरले आफ्ना क्रियाकलाप पूर्ण र दीर्घकालीन रुपमा सञ्चालन गर्ने बताएको  छ।

महानगरका मेयर बालेन्द्र (बालेन) शाहले बिहीबार विज्ञप्ति जारी गर्दै सडकमा पैदलयात्रीको पहिलो अधिकार रहने र यसलाई स्थापित गराउन महानगरपालिकाले आफ्ना नीति तथा कार्यक्रम तर्जुमा गरेको बताएका छन्।

‘सहरको विकास, सुधार र समृद्धिका लागि कानुन प्रदत्त अधिकार कार्यान्वयन गरेर नागरिक जीवनमा सुधारको महसुस गराउने हाम्रो प्रतिवद्धता हो। यो कायम छ। यसैगरी सहरी सरसफाइलाई पूर्ण सरसफाइसम्म पुर्याउने, सहरी सुन्दरता कायम गराउने जस्ता विषयलाई हामीले नीतिगत व्यवस्था गरेर कार्यान्वयनका लागि कार्यक्रम सञ्चालन गरिरहेका छौं,’ विज्ञप्तिमा भनिएको छ, ‘आर्थिक बर्ष २०७९–०८० को वार्षिक नीतिअन्तर्गत पूर्वाधार विकास सम्बन्धी नीतिमा ‘पैदल यात्री सहज आवागमनका लागि फुटपाथको उपयोग सहज र सरल बनाइनेछ। फुटपाथमा मानव आवतजावतबाहेकका सबै क्रियाकलापलाई निषेध गरिनेछ भन्ने व्यवस्था गरिएको छ।’