मनास्लु हिमपहिरोले लग्यो पुस्ताकै 'उत्कृष्ट' स्की पर्वतारोही

काठमाडौं- हिलारी नेल्सन मनास्लु हिमालमा स्की खेलका लागि नेपाल आएकी थिइन्। सोमबार मनास्लुमा उनले स्की पनि गरिन्। स्कीका क्रममा मनास्लुमा आएको हिमपहिरोले उनलाई सधैँका लागि लिएर गएको छ। 

बुधबार बिहान मृत्यु भएको अवस्थामा हिलारीको शव भेटिएको थियो। नेपालीहरु मनास्लुलाई ‘किलर माउन्टेन’ भनेर पनि चिन्ने गरेका छन्। किनभने यहाँ ७० भन्दा धेरैले ज्यान गुमाइसकेका छन्।

नेल्सनका श्रीमान जिम मोरिसनको विवरणको आधारमा, नेल्सन शिखरको धारबाट चिप्लिएर डेथजोनमा खसेकी थिइन्। उनी शिखरको दक्षिणी क्षेत्र तर्फबाट तल खसेकी थिइन्।

नेल्सन खराब स्की गर्ने खेलाडी भने होइनन्। उनको पुस्ताको सबैभन्दा उत्कृष्ट पर्वतारोही हिलारी भएको भएको स्पोन्सर कम्पनी नर्थ फेसको दाबी छ।

स्की एडभेन्चर गर्न रुचाउनेहरूका लागि मनपर्ने देशमध्येको एक हो नेपाल। यहाँका हिमालबाट दक्षिणतर्फको ढलान धेरै भएका कारण पनि स्की एड्भेन्चर पर्यटक नेपाल आउने गरेका छन्। त्यसैले हिलारी पनि नेपाल आइरहन्थिन्। नेपालमा भएका हिमालको अवलोकन मात्र गरिनन् उनले, आफैं चढेर अनुभव गरिरहिन्। हिलारी त्यस्तो खेलाडी हुन् जसले २४ घण्टाभित्र ८ हजार मिटरअग्ला दुई हिमालको आरोहण गरेकी छन्।

सन् २०१२ मा उनले पहिले सगरमाथाको आरोहण गरिन्। अनि त्यसका २४ घण्टा नपुग्दै ल्होत्सेको पनि सफल आरोहण गरिन्। सगरमाथा विश्वकै अग्लो हिमाल हो भने ल्होत्से विश्वकै चौथो अग्लो हिमाल हो। उनी विश्वकै साहसी महिलाको २५औं नम्बरमा परेकी थिइन्। यो चाहिँ मेन्स जोर्नलले गरेको मूल्यांकनमा आधारित छ।