देवदह नगरकमिटी अध्यक्ष चापागाईंद्वारा एमाले परित्याग

बुटवल- नेकपा एमाले देवदह नगर कमिटीका अध्यक्ष टिकाराम चापागाईंले एमाले परित्याग गरेका छन्। देवदहमा पत्रकार सम्मेलन गर्दै अध्यक्ष चापागाईंले पार्टीको सबै जिम्मेवारी र पार्टी सदस्यता समेत परित्याग गरेको घोषणा गरेका हुन्।

पार्टीमा सधैंभरी सिमित मान्छे नेता हुने र कार्यकर्ताहरु सधैं कार्यकर्ता बन्नुपर्ने भएपछि त्यसविरुद्ध आफूले विद्रोह गरेको उल्लेख गर्दै एमाले परित्याग गरेको बताए। उनले आगामी मंसिर ४ मा प्रतिनिधि सभा चुनावमा स्वतन्त्र उम्मेदवारी दिने घोषणा गरेका छन्।

४१ वर्षदेखि नेकपा एमालेको विभिन्न जिम्मेवारीमा रहेर काम गरेको स्मरण गर्दै उनले स्थानीय विकासका लागि स्थानीय नेतृत्वले राजनीतिको बागडोर सम्हाल्नुपर्नेमा बताए। चापागाईंले प्रजातान्त्र तथा दलीय व्यवस्था अपरिहार्य रहे पनि पछिल्लो समय हरेक पार्टिहरुमा निरंकुश प्रवृत्ति हावी भएको दाबी गर्दै आफू स्वतन्त्र रुपमा रहेर देश तथा आफ्नो क्षेत्रको समग्र विकासमा समर्पित हुने बताए। यसअघि विसं २०७४ सालमा एमालेबाट मेयरका उम्मेद्वार थिए।