माओवादीको प्रचार गर्न बुद्धिजीवीले बनाए ५०१ सदस्यीय समिति

काठमाडौं- नेपाल कम्युनिस्ट पार्टी (माओवादी केन्द्र)को प्रचार गर्न नेपाल बुद्धिजीवी सङ्गठनले समिति घोषणा गरेको छ। ५०१ सदस्यीय समितिमा मङ्सिर ४ गते हुने प्रतिनिधि र प्रदेशसभाको निर्वाचनमा माओवादीका कार्यक्रम प्रचार गरिने समितिले जानकारी दिएको छ। 

सङ्गठनका संयोजक कृष्ण केसीको संयोजकत्वमा निर्वाचन परिचालन समिति गठन गरेको हो। समितिको सहसंयोजकमा निलकण्ठ तिवारी छन्। निर्वाचन परिचालन समितिमा केन्द्रीय समितिका सदस्य, केन्द्रीय आयोगका पदाधिकारी र सदस्य, केन्द्रीय विभागका पदाधिकारी र सदस्य, प्रदेश समितिका पदाधिकारी तथा सदस्य रहेका छन्। 

सङ्गठनको केन्द्रीय कार्यालय टिमलाई निर्वाचन परिचालन समितिको सचिवालय बनाएर निर्वाचनसम्बन्धी कामको परिचालन गर्नेसमेत निर्णय गरिएको संयोजक केसीले जानकारी दिए। 

बैठकले निर्वाचन अघि आमजनसमुदायलाई माओवादी र गठबन्धनका उम्मेदवारलाई जिताउन आग्रहसहितको अपिल प्रकाशन गर्ने, माओवादी आन्दोलनका प्रमुख उपलब्धि नामक पुस्तिका परिमार्जनसहित पुनःप्रकाशन गर्ने, प्रदेश र स्थानीय तहमा निर्वाचन परिचालन समिति बनाउनेलगायत निर्णय गरेको छ। 

बैठकमा माओवादी केन्द्रका सचिव एवं बुद्धिजीवी सङ्गठनका इञ्चार्ज दिनानाथ शर्माले आसन्न निर्वाचनमा क्रान्तिकारी बुद्धिजीवीले जनतालाई वैचारिक दिशानिर्देश दिनुपर्ने बताए।