टुकुचामाथिको अतिक्रमण हटाउने काम ठिक भएपनि प्रक्रिया गलत : पूर्वसचिव थापा

काठमाडौं- पूर्वसचिव किशोर थापाले टुकुचा खोलामाथिको अतिक्रमण हटाउने काम ठिक भएपनि काठमाडौं महानगरपालिकाको प्रक्रिया गलत भएको बताएका छन्। टुकुचा खोला अतिक्रमणबारे पीडित, महानगर प्रतिनिधि, र कानुनविदसँगको अन्तर्क्रिया कार्यक्रममा बोल्दै २०७४ सालमा महानगर मेयका लागि उम्मेदवारसमेत रहेका पूर्वसचिव थापाले यस्तो बताएका हुन्। 

महानगरबाट नै पारित भएका नक्साअनुसार बनाइएका संरचनामा वर्षौँदेखि बसोबास गर्दै आएका नागरिकसँग छलफल र परामर्श नगरी योजनाविहीन भएर महानगरले चलाएको डोजर अभियानबारे उनले असन्तुष्टि व्यक्त गरे। 

'सहरी विकासको सन्दर्भमा टुकुचा खोला कस्तो हुनुपर्ने हो र त्यसलाई कस्तो बनाउनु पर्ने हो भन्नेबारे महानगरले योजना बिनै उत्खननमा लागेको देखिएको  छ। ढल र फोहरको उचित व्यवस्थापन र नदी क्षेत्रमा भइरहेको अतिक्रमणलाई ध्यान दिएर डोजर अभियानलाई अगाडि बढाउनुपर्छ,' उनले भने, 'यो योजनाको फाइदा र नोक्सान प्रभावित क्षेत्रकै स्थानीयहरूले बेहोर्ने हुन्। टुकुचा क्षेत्रमा नक्सा पास गरी कानुनी रूपमै बसोबास गर्दै आएका पीडित र अतिक्रमण गरी बसेकाहरूसँग छुट्टाछुट्टै छलफल गरेर समस्याको समाधानतर्फ लाग्न महानगर चुक्नुहुँदैन।’ 

इन्जिनियर योगेश मिश्रले काठमाडौँ महानगरले टुकुचा उत्खनन सुरु गर्नु पूर्व नै सम्पूर्ण अध्ययन अनुसन्धान सुरु हुनुपर्नेमा जोड दिए।२०२१ मा तत्कालीन पञ्चायतबाट नक्सा पास गरी कानुनी रूपमै सो क्षेत्रमा बसोबास गर्दै आएकाले आफूहरूलाई भूमाफियामा गणना गरिएको भन्दै उनले दुखेसो व्यक्त गरे। 

जलस्रोत विज्ञ अरुणभक्त श्रेष्ठले टुकुचा उत्खनन गर्दा वस्तुगत अनुसन्धानबाट व्यवस्थापनबारे निकास दिनुपर्नेमा जोड दिए। कानुनविद् भरत खरेलले व्यक्तिगत तथा निजी सम्पत्तिको वास्ता नगरी डोजर चलाउन नहुने बताए।