समानुपातिक सूचीप्रति कांग्रेसमा असन्तुष्टि, शेखर समूहले बोलायो भेला

काठमाडौं– समानुपातिक उम्मेदवारको बन्द सूचीमा सभापति शेरबहादुर देउवा समूहले एकलौटी गरेको भन्दै सत्तारुढ दल नेपाली कांग्रेसमा असन्तुष्टि बढेको छ। देउवा समूहले एकलौटी ढंगबाट समानुपातिक सूची निर्वाचन आयोगमा बुझाएको भन्दै इतर समूहले प्रतिकारमा उत्रिने निर्णय गरेको छ। 

१४ औं महाधिवेशनका सभापतिका प्रत्यासी डा. शेखर कोइराला समूहले सभापति देउवाले एकलौटी गरेको विरोधमा शनिबार  खबरदारी सभाको आयोजना गर्ने भएको छ। शेखर समूहले शनिबार बानेश्वर ब्यांक्वेटमा दिउँसो १ बजेलाई खबरदारी भेला बोलाएको नेता अर्जुननरसिंह केसीले जानकारी दिए। उनले भने, ‘समानुपातिक सूचीमा सभापतिज्यूले एकलौटी गर्नुभयो। हाम्रो समूहका साथीहरूको नाम काट्ने काम भयो। पार्टीभित्र मनपरित्रतन्त्र हावी भयो। सभापतिले एकलौटी गरेपछि शनिबार खबरदारी भेला बोलाएका छौं।’ 

देउवा समूहले समानुपातिकमा एकलौटी गरेजस्तै प्रत्यक्षतर्फको टिकटमा पनि एकपक्षीय गतिविधि हुने भय शेखर समूहमा देखिएको छ। प्रत्यक्षतर्फको टिकट वितरणका लागि देउवालाई दबाब दिनका लागि शेखर समूहले खबरदारी भेला बोलाएको हो।