खुला टेबलटेनिसमा हिमाल र वियन्कालाई स्वर्ण

काठमाडौं- आयोजक काठमाडौं खेल मण्डल (केकेएम) न्यु रोड टिम (एनआरटी)का हिमाल विष्ट र एपीएफकी वियन्का राईले केकेएम-एनआरटी खुला टेबलटेनिस प्रतियोगितामा बिहीबार स्वर्ण जितेका छन्। यु–१९ जुनियर सिंगल्सको ब्वाइजमा हिमाल र गर्ल्समा वियन्का पहिलो भएका हुन्।

लैनचौरस्थित राष्ट्रिय टेबलटेनिस प्रशिक्षण केन्द्रमा भएको ब्वाइज् फाइनलमा हिमालले कान्तिपुर भ्याली पिङपोङ क्लबका विशाल गोलेलाई ११–६, ७–११, ११–६ र ११–७ को सेटमा पराजित गरे। केकेएम-एनआरटीका धनन्जय दाहाल र एपीएफका रुविन महर्जन तेस्रो भए।

गर्ल्सको उपाधि भिडन्तमा वियन्काले मोर्डन कलेजकी दिया देउलालाई १२–१०, ८–११, ११–७ र ११–८ को सेटमा हराए। नेपाल आर्मीकी सुष्मिता खड्का र केकेएम÷एनआरटीकी अन्जु सुवालले कास्य हात पारे। पुरुष-महिला खुला सिंगल्समा क्‍वार्टरफाइनल समीकरण पूरा भएको छ।